رۆژنامەیا قورەیشا لەندەنێ بەلاڤ کر، بەرپرسێن ئەولەھیا یەنەکێ 2 ئەفسەرێن ئیستخباراتا ئامەریکایێ ل سلێمانیێ رەڤاندنە و بەر ب سینۆرێ ئیرانێ ڤە برنە، لێ ھێزێن تایبەتێن ئامەریکایێ زوو گەھەشتنە وان و کارینە ھەردو ئەفسەرێن خوە رزگار بکن. ڤێ یەکێ سەرۆکێ یەنەکێ بافل تالەبانی خستیە رەوشەکا شەرمەزاریێ و پشتی وێ ژی د ئاستا بلند دە ئامەریکایێ پەیوەندی ل گەل پێکانیە.
ل گۆر وێ راپۆرتێ کو ژ چاڤکانیەکی ئاگاھدار ڤە ھاتیە بەلاڤکرن، وەھاب ھەلەبجەیی یێ تەرۆریست و سەرۆکێ دژەتەرۆرا یەنەکێ و شوکر پشدەری یێ بەرپرسێ ئیستخباراتێ ل دژەتەرۆرا یەنەکێ ل سلێمانیێ، د دەما ھەردو ئەفسەرێن ئامەریکایێ ژ سلێمانیێ ڤە بەر ب ھەولێرێ ڤە د رێ دە بوونە، ئەو 2 ئەفسەرێن ئیستخباراتا ئامەریکایێ رەڤاندنە.
ھەمان رۆژنامەیێ راگەھاندیە، رەڤاندنا وان ھەردو ئەفسەرێن ئامەریکایێ ژی ب ئالیکاریا ئیتلاعاتا ئیرانێ ڤە پێکھاتیە، کو وان ھەردو ئەفسەرێن ئامەریکایێ ڤەگوھێزن بۆ ئیرانێ.
رۆژنامەیا قورەیش دیار کر، د دەما چەند دەمژمێرێن رەڤاندنا وان ھەردو ئەفسەران دە، ژ ئالیێ ھێزا دەلتا یا تایبەت یا ئامەریکایێ ڤە جیھێ وان ب جی پی ئێسێ ھاتیە دیار کرن و ب ئۆپەراسیۆنەکی ژ ئەسمان ڤە داکەتنێ ڤە ل زەڤیەکی ناڤ گوندێ کانی سەردا ناحیەیا سیتەک یا ل باکورێ رۆژھلاتێ سلێمانیێ، ئەو ھەردو ئەفسەرێن ئیستخباراتا ئامەریکایێ ژ ئالیێ ھێزا دەلتا یا تایبەتا ئامەریکایێ ڤە ھاتن رزگار کرن و ئەوێن ل گەل وان ژی ھاتن گرتن.
ھەمان رۆژنامەیێ راگەھاند: “رۆژا 25/1/2024 د ھەلمەتەکی دە ھێزا دەلتایا تایبەت یا ئامەریکایێ کاری بەرپرسێ ئیستخباراتا دژەتەرۆرا یەنەکێ ل سلێمانیێ شوکر پشدەری ژی بگرە و ڤەگوھێزە بۆ بنکەیێ ھێزێن ھەڤپەیمانیا ناڤنەتەوی یا ل سلێمانیێ (مەعەسکەر سەلام)یا سەر ب یەکینیێن 70 یا ھێزێن پێشمەرگە.
ل گۆر ھەمان چاڤکانیێ رۆژا 25/1/2024 دەمژمێر 18:00 بەرپرسێ ھێزێن ئامەریکایێ ل سلێمانیێ سەرۆکێ یەنەکێ بافل تالەبانی ژ بوویەرێ ئاگاھدار کریە و وەرگرتنا تەڤدیران ژی ژێ رە گۆتیە و وی ژی د بەرسڤێ دە گۆتیە ئاگاھیا وی ژ وی کاری تنە و من ت فەرمانەکی وسا نەدایە.
رۆژنامەیا قورەیش دبێژە: بافل تالەبانی ژ بەرپرسێ ھێزێن ئامەریکایێ رە گۆتیە، دێ لێپرسینەکە توند ل گەل سەرۆکێ دژەتەرۆرا ینکێ وەھاب ھەلەبجەیی بکە و ل سەر ڤێ بوویەرێ گۆتیە ئەزێ وی جەزا بکم. لێ ژ ئالیێ دن ڤە ژی گۆتیە، ژ بەر گڤاش و فشارێن ئیرانێ ئەز نکارم وی ژ ڤی ئەرکێ دووربخم.
ھەمان رۆژنامە دبێژە، ژ بەر وێ بوویەرێ سەرۆکێ یەنەکێ بافل تالەبانی بانگی سەرۆکێ دژەتەرۆرا یەنەکێ وەھاب حەلەبجەیی کریە بۆ بنکەیێ رێڤەبەریا یەنەکێ ل دەباشان و قیر ل سەر دە کریە و ناکۆکی د ناڤبەرا وان دە دەرکەتنە.
