رێخستنا “جوانێن شۆرەشگەر” یا سەر ب پەکەکێ ڤە ل باژارێ عاموودێ زارۆکەکا تەمەن بچووک ب ئارمانجا چەکدارکرنا وێ د ناڤ رەفێن پارتیێ دە رەڤاند.
ل گۆر زانیاریێن رووپەلا دارکا مازی، ناڤێ زارۆکا هاتیە رەڤاندن مایا عزەدین شاکرە، ئەو 13 سالیە و ل پێش مالا وێ یا ل باژارێ عاموودێ ھاتیە رەڤاندن و هەیا نها چارەنڤیسا وێ نەدیارە.
کارێ سەرەکە یێ چەتەیێن ب ناڤێ جوانێن شۆرەشگەر یێن کو راستەراست فەرمانا ژ قەندیلێ وەردگرن، رەڤاندنا زارۆکانە ل رۆژئاڤا کوردستانێ ژ بۆی چەکدارکرنا وان د سەربازگەهێن زۆرەملی دە.
“جوانێن شۆرەشگەر” ب تەنێ د سالا 2023 دە ل رۆژئاڤا و دەڤەرێن د بن دەستهلاتا هەسەدێ دە زێدەتری 60 زارۆک رەڤاندنە و تەڤێ ڤێ یەکێ کو مالباتێن وان داخوازا ڤەگەراندنا زارۆکێن خوە دکن ژی لێ هەیا نها چارەنڤیسا پرانیا وان نەدیارە.
رەڤاندنا زارۆکان ژ ئالیێ “جوانێن شۆرەشگەر” ل رۆژئاڤا کوردستانێ د دەمەکی دە یە کو، فەرماندارێ هەسەدێ مەزلووم کۆبانێ، د سالا 2019 دە ل گەل ڤێرجینیا گامبا نوونەرا نەتەوێن یەکگرتی بوو کارووبارێن زارۆکان پەیمانەک ئیمزە کریە، کو ئێدی زارۆکان تەڤلی ھێزێن خوە نەکە و یێن د ناڤ دە سەربەست وەرن بەردان، لێ تا نھا چ پابەندی ب پەیمانێ نەھاتیە کرن، و رەڤاندن و لەشکەرکرنا زارۆکان بەردەوامە.
