ل سەر داخوازا رێکخستنێن پاراستنا مافێن مرۆڤان، خەلکێ باژارێن رۆژھلاتێ کوردستانێ ب داخستنا دکان و سووکان دەست ب گرەڤا گشتی کر، ژ بۆ شەرمەزارکرنا بدارڤەکرنا چار جوانێن سیاسی یێن کورد ژ ئالیێ حکوومەتا ئیرانێ ڤە. ئەڤ دیارکرنا نەرازیبوونێ د دەمەکێ دەیە کو ھێزێن ئەولەھیێ یێن ئیرانێ تەرمێ وان ھەر چار جوانێن کورد نەدانە مالباتێن وان.
شەش رێکخستنێن گرێدایی مافێن مرۆڤان ل رۆژھلاتێ کوردستانێ د راگەھاندنەکا ھەڤپار دە داخواز ژ خەلکێ باژارێن رۆژھلاتێ کوردستانێ کریە کو دەست ب گرەڤا گشتی و سەرانسەری بکن و بدارڤەکرنا وان ھەر چار جوانێن سیاسی یێن کورد شەرمەزار بکن.
پشتی بەلاڤبوونا وێ راگەھاندنا ھەڤپار، سەرێ سبەھا ئیرۆ (سێشەمبێ، 30/1/2024) خەلکێ باژارێن رۆژھلاتێ کوردستانێ ب داخستنا دکان و سووکان دەست ب گرەڤێ و شەرمەزارکرنا بدارڤەکرنا چالاکێن سیاسی و سڤیلێن کورد ژ ئالیێ حکوومەتا ئیرانێ ڤە کر.
رێکخستنا ھەنگاوێ یا مافێن مرۆڤان بەلاڤ کریە، ھێزێن ئەولەھیێ یێن ئیرانێ تەرمێن وان ھەر چار جوانێن کوردێن کو بدارڤە کرنە نەدانە مالباتێن وان، لێ ژ مالباتێن وان رە راگەھاندیە کو ئەو ب خوە دێ وان ب رەنگەکێ نھێنی ل جھەکێ نەدیار ڤەشێرن. حکوومەتا ئیرانێ ژ وێ یەکێ دترسە کو تەرمێن وان بدە کەسووکارێن وان و د دەما ڤەشارتنا وان دە مەراسیمێن رێزگرتنێ بێن کرن و پاشی خوەنیشاندان بێن کرن.
داخوازکەرێ گشتی یێ تەھرانێ ژی راگەھاندیە کو، ژ بەر بەلاڤکرنا مژارا پشتەڤانیێ ژ بۆ وان ھەر چار جوانێن کو ھاتنە بدارڤەکرن، سکالا ل دژی رۆژنامەڤانەکی لڤاندیە، بێ کو ناڤێ وی رۆژنامەڤانی ئەشکەرە بکە، لێ ئاژانسا نووچەیان یا فارسێ ئەشکەرە کریە کو، ئەو رۆژنامەڤانێ داخوازکەرێ گشتی یێ تەھرانێ ساکالا ل سەر تۆمار کریە، ناڤێ وی شێرزاد ھیمەتی یە و برێڤەبەرێ پشکا جڤاکی یا رۆژنامەیا شەرقێ یە کو ل تەھرانێ دەردکەڤە.
خەلکێ رۆژھلاتێ کوردستانێ ژ بۆ رێزگرتن ل جانێ ھەر چار جوانێن بدارڤەکری و پشتەڤانی و دلخوەشکرنا مالباتێن وان ب تاجەگولان سەردانا مالباتێن وان کریە و تەڤلی مەراسیمێن بەھیا وان بوونە.
