گرۆپێن چەکدارێن ئۆپۆزیسیۆنا سووریەیێ یێن لگەل ئارتێشا ترکیەیێ ھەرێما عەفرینێ داگیر کرنە، 5 وەلاتیێن کورد ژ گوندێن عەفرینێ رەڤاندن، 2 ژ ناڤا وان ژنن.
رێخستنا مافێن مرۆڤان ل عەفرینێ بەلاڤ کر، گرۆپا چەکدار یا ب ناڤێ “پۆلیسێن لەشکەری” ژ رۆژا 17 ڤێ مەھێ ڤە ژنا ب ناڤێ لەمان رەشید سیدۆ یا 35 سالی ژ گوندێ مەتینا رەڤاندیە و ھەتا نھا چارەنڤیسا وێ نە دیارە.
دیار کر ژی، لەمان رەشید سیدۆ د دەما داوی دە ژ حەلەبێ ڤەگەریابوو گوندێ خوە و 1700 دۆلار دابوو گرۆپا “سولتان موراد” یا دەست دانیە سەر گوندێ مەتینا.
رێخستنا مافێن مرۆڤان دا زانین ژی، خۆرتێ ب ناڤێ سلێمان جومعا محەمەد ژ رۆژا 24 ڤێ مەھێ ڤە ل سەر رێبەندا گوندێ ترندێ ژ ئالیێ گرۆپا “پۆلیسێن لەشکەری” ڤە ھاتیە رەڤاندن و چارەنڤیسا وی ژی نە دیارە.
ژ ئالیێ خوە ڤە، رەوانگەھا سووری یا مافێن مرۆڤان بەلاڤ کر، کەسەکی ئاستەنگدەر و ھەڤژینا وی ژ گوندێ خالتا ژ ئالیێ گرۆپێن چەکدار ڤە ھاتن رەڤاندن.
رەوانگەھێ دیار کر ژی، جوانەکی دنێ ژ گوندێ ئانقەلێ ژ ئالیێ گرۆپێن چەکدار ڤە ھات رەڤاندن و چارەنڤیسا وی ژی نە دیارە.
ھەرێما عەفرینێ ژ ئادارا 2018 ڤە ژ ئالیێ ئارتێشا ترکیێ و گرۆپێن چەکدارێن سەر ب وێ ڤە ھاتیە داگیرکرن و ھەتا نھا زێدەتر ژ 9 ھەزار کەس ھاتنە رەڤاندن کو چارەنڤیسا ھەژمارەکا مەزن ژ وان نایێ زانین.
ل گۆر چالاکڤانێن عەفرینێ، گرۆپێن چەکداران ب ئارمانجا کو کوردێن عەفرینێ نەچار ببن دەست ژ جھ و وارێ خوە بەردن و کۆچبەر ببن، وەلاتیان درەڤینن و ئەشکەنجە ددن، پەرە، فدیە و باجان ژ وان دستینن.
