دژەتەرۆرا کوردستانێ رەد دکە کو ئێریش ل سەر بالافرخانەیا ناڤدەولەتی یا ھەولێرێ ھاتبە کرن و دبێژە، ئەو نووچەیێن بەحسا ئێریشەکا درۆنی ل سەر بالافرخانەیا ناڤدەولەتی یا ھەولێرێ دکن بێ بنگەھ و نەراستن.
دژەتەرۆرا کوردستانێ پەیامەک بەلاڤ کریە کو تێ دە ھاتیە، “ئیرۆ (چارشەم، 31/1/2024) ھەژمارەکا مەدیا و کانالێن ناڤخوەیی، کو گەلەک دلخوازێن ئارمانجکرنا ھەولێرێ نە، بێ پشتراستکرن و ل دویڤ مەدیای، نووچەیەک بەلاڤ کریە کو ئیرۆ ب درۆنێن بۆمبەکری ئێریشی بالافرخانەیا ناڤدەولەتی یا ھەولێرێ ھاتیە کرن.”
دژەتەرۆرا کوردستانێ د پەیاما خوە دە گۆتیە، “ئەڤ نووچە بێ بنگەھ و نەراستە و چ ئێریش نەھاتنە سەر بالافرخانەیا ناڤدەولەتی یا ھەولێرێ.”
ل دوو زانیارێن وەزارەتا بەگریێ یا ئامەریکایێ (پەنتاگۆن)، ژ 17 جۆتمەھا 2023 ھەتا نھا، زێدەتری 160 جاران ئێریشی ھێزێن ئامەریکایێ ل رۆژھلاتا ناڤین ھاتیە کرن و د وێ دەمێ دە زێدەتری 120 سەربازێن وان بریندار بوونە و سێ سەرباز ژی ھاتنە کوشتن.
ئامەریکا گەلەک ب رۆنی دبێژە کو ھەموو ئەو ئێریشێن ل سەر ھێزێن وان ل رۆژھلاتا ناڤین تێن کرن ژ ئالیێ کۆمێن ملیشیایێن گرێدایی ئیرانێ ڤە تێن کرن. ھەروەسا ئامەریکا ئیرانێ بەرپرسیار دبینە، لێ ناخوازە شەر ل رۆژھلاتا ناڤین بەرفرەھتر ببە، تەڤی کو ھەر دەما گەف بکەڤە سەر ھێزێن وان د دەم و جھێن گونجایی دە بەرسڤا وان ئێریشان ددن.
