کۆلبەرەکی جوان یێ خەلکێ سەلاسی باوەجانی ل رۆژھلاتێ کوردستانێ، کو 3 رۆژان بەری نھا ب گولـلەیێن راستەراست یێن ھێزێن ئەولەھیا ئیرانێ ب گرانی ھاتبوو بریندار کرن، ل نەخواشخانەیا تالقانی یا کرماشانێ ژیانا خوە ژ دەست دا.
شەڤا بۆری کۆلبەرێ تەمەن 30 سالی یێ ب ناڤێ جەبار وەیسی کو خەلکێ سەلاسی باوەجانی یە و سێ رۆژان بەری نھا د دەما کۆلبەریێ دە ل سینۆرێ نەوسوود ب گولـلەیێن راستەراست یێن ھێزێن ئەولەھیا ئیرانێ بریندار ببوو، پشترە ژ بۆ چارەسەریێ ئەو ڤەگوھەستبوون بۆ نەخواشخانەیا تالقانی یا کرماشانێ، لێ ژ بەر برینا وی گرانبوو ژیانا خوە ژ دەست دا.
رێخستنێن مافێ مرۆڤان یێن رۆژھلاتێ کوردستانێ دبێژن ئەو کۆلبەر د سەرێ خوە دە ھاتبوو بریندار کرن و گولـلە ل مەژیێ وی کەتبوو.
ھەروھا ل گەل جەبار وەیسی کو خەلکێ گوندێ جۆجار یێ سەر ب باژارێ سەلاسی باوەجانی یە، دو کۆلبەرێن دن یێن ب ناڤێن بەرزان و یەزدان ژی ب وی رە ب گولـلەیێن راستەراستێن ھێزێن ئەولەھیا ئیرانێ بریندار ببوون.
