کۆلبەرەکی خەلکێ باژارێ پاوە یا رۆژھلاتێ کوردستانێ، کو رۆژا بۆری ب گولـلەیێن راستەراست یێن ھێزێن ئەولەھیا ئیرانێ ب گرانی بریندار بوو، ب ئارمانجا دەرخستنا چاڤێ وی ژ بۆ نەخوەشخانەیەکا باژارێ تەھرانێ ھاتە ڤەگوھەستن.
دوھ 3/2/2024 کۆلبەرێ خەلکێ گوندێ شمشێر یا سەر ب باژارێ پاوەیێ ب ناڤێ کۆسار رۆستەم نەژاد، پشتی ب گولـلەیێن راستەراست یێن ھێزێن ئەولەھیا ئیرانێ د دەست و چاڤێن خوە دە بریندار بوو، ب ئارمانجا چارەسەری و دەرخستنا چاڤێ وی ژ کرماشانێ ڤە ژ بۆ نەخوەشخانەیەکا باژارێ تەھرانێ ھاتە ڤەگوھەستن.
ڤێ دەربارێ دە رێخستنا ھەنگاو یا مافێ مرۆڤان راگەھاند، چاڤێ وی کۆلبەری گولـلەیا ھێزێن ئەولەھیا ئیرانێ پێکەتیە و پزیشکێن نەخوەشخانەیا تالەقانی یا باژارێ کرماشانێ ژ وان رە راگەھاندبوون، ئێدی شیانا چارەسەرکرنا چاڤێ کۆسار رۆستەم نەژاد نینە و پشترە ژی ژ بۆ چارەسەریا زێدەتر ئەو ژ نەخوەشخانەیا باژارێ تەھرانێ رە ھاتە شاندن.
کۆلبەرێ کو رۆژا ئینێ برینداربوو و ژ بۆ چارەسەریا پزیشکی ژ نەخواشخانەیا تالەقانی یا باژارێ کرماشانێ رە ھاتبوو ڤەگوھەستن، رەوشا تەندورستیا وی نھا د جیھ دە نینە.
ھات زانین کۆسەر رۆستەم نەژاد بابێ دو زارۆکانە، بھارا سالا 2021 جارەکە دن ژ ئالیێ ھێزێن ئەولەھیا ئیرانێ ڤە ل سینۆرێ باژارێ نەوسوودێ د دەما کۆلبەریێ دە دیسا بریندار ببوو، ھەروەھا برایەکی وی یێ ب ناڤێ فەرشاد ژی سالا بۆری دیسا ب گولـلەیێن راستەراست یێن ھێزێن ئیرانێ د دەما کۆلبەریێ دە ژ پشتا خوە ب گرانی بریندار ببوو و نھا بوویە خوەدی پێویستیێ تایبەت.
