ل عەفرینا رۆژئاڤایێ کوردستانێ د ئەنجاما تەقینا مۆتۆرسیکلەکا بۆمبەکری دە، ھەژمارەک کەس بریندار بوون.
ژێدەرەکی ژ باژارێ عەفرینێ ئەشکەرە کر، ئیرۆ دانێ ئێڤارێ مۆتۆرسیکلەکا بۆمبەکری ل نێزیک قادا نەورۆزا عەفرینێ تەقیا و د ئەنجامێ دە ھەژمارەک کەس بریندار بوون.
ژ ئالیێ خوە ڤە بەرەڤانیا سڤیلا سووری بەلاڤ کر، د ئەنجاما تەقینێ دە 4 کەس بریندار بوونە و تیمێن وان چارەسەریێن دەستپێکێ ژ برینداران کرن.
ل گۆری زانیاریان گرۆپا “پۆلیسێن لەشکەری” زارۆکەکی بریندار و کەسەکی دن گرتن و ب وان رە دەست ب لێکۆلینێ کر.
ژ دەما داگیرکرنا عەفرینێ ژ ئالیێ ئارتێشا ترکیێ و گرۆپێن چەکدارێن سەر ب وێ ڤە د ئادارا 2018 دە، رەوشا ئەولەھیێ ب یەکجاری تێک چوویە و گەلەک جاران ل باژێر تەقین روو ددن و وەلاتیێن سڤیل ژی دبن قوربانی.
