کۆنسولخانەیا گشتی یا ئامەریکایێ ل ھەولێرێ دبێژە، “بنپێکرنێن ئازادیا راگەھاندنێ ل ھەرێما کوردستانێ ب رەنگەکێ بەرچاڤ کێم بوونە”.
دەستەیا کۆنسولخانەیا گشتی یا ئامەریکایێ ل ھەولێرێ ئیرۆ چارشەمێ، 7/2/2024 لگەل ھنەک پەیامنێرێن وان مەدیایێن ئامەریکایی رە جڤیایێن کو نڤیسینگەھێن وان ل ھەولێرێ ھەنە و راگەھاند، “ئامەریکا ب کێمبوونا بەرچاڤ یا بنپێکرنێن ئازادیا راگەھاندنێ ل ھەرێما کوردستانێ دلخوەشە، ئەو ژی پشتەڤانیا ژینگەھەکێ دکە کو تێ دە رۆژنامەڤان بکارن ب ئازادی و بێ ترس، ئالیگری و کارکرنا ل سەر بنگەھێن پارتاتیێ کارێ خوە بکن”.
ئەڤ د دەمەکێ دەیە کو کۆنسولخانەیا گشتی یا ئامەریکایێ ل ھەولێرێ ب رەنگەکێ بەردەوام چاڤدێریا ئازادیا راگەھاندنێ و دیارکرنا دیتن و نەرینان ل ھەرێما کوردستانێ دکە و سەردانا دەزگەھێن راگەھاندنێ ل ھەرێما کوردستانێ دکە. ھەروەسا پێشوازیا رۆژنامەڤانان ژی دکە ژ بۆ کو ژ نێز ڤە دیتن و نەرینێن وان ل سەر ئاستێ ئازادیا دیارکرنا دیتن و نەرینان ل ھەرێما کوردستانێ وەربگرن.
ل سەر ھەبوونا باوەریێ ب بنگەھێن ناڤدەولەتی و ئازادیێن رۆژنامەڤانی، کابینەیا نەھێ یا حکوومەتا ھەرێما کوردستانێ بزاڤ کریە کو ھەری زێدە ئازادیا دیارکرنا دیتن و نەرینان ھەبە و جانێ رۆژنامەڤانان پاراستی بە، ژ بۆ کو ئازادی و شەفافیەت ل سەر بنگەھا پاراستنا بەرژەوەندیان پێش ڤە بچن.
