پارلامەنتەرێن دەم پارتیێ محەمەد رووشتوو و ساروحان ئۆلوچ، ل گرتیگەھێ دە سەردانا سەلاحەدین دەمیرتاش کرن و د دەربارێ ڤەکشاندنا کاندیدیا باشاک دەمیرتاش دە راگهاندن، وان دیتنێن سەلاحەدین دەمیرتاش دەربارێ ڤێ مژارێ وەرگرتن و ژ بۆی رایا گشتی پارڤە دکن.
پارلەمەنتەرێ ئانتالیا یێ دەمێ محەمەد تریاک د ئاخاڤتنا خوە دە گۆت:
رێزدار باشاک دەمیرتاش ئیرۆ داخویانیەک دا و دیار کر کو خوە ژ کاندیدیا خوە ڤەکشاندیە. ئەم دخوازین ھوون بزانن کو ئەڤ بریارە هەموو د چارچۆڤەیا زانینا پارتیا مە دە و د ئەنجاما گۆتوبێژێن ھەڤبەش دە ھاتنە گرتن. د ڤێ مژارێ دە پەیامەکا وی (سەلاحەدین دەمیرتاش) پر زەلالە. ئەم دخوازین ڤێ لگەل وە دا پارڤە بکن. تشتا کو دەمیرتاش گۆت ئەڤەیە: داخویانیا کاندیدیێ یا باشاک ژ بۆ خورتکرنا پارتیا مە بوو و داخویانیا وێ یا ڤەکشینێ ژی ب ئاگاھیا پارتیا مە بوویە.” ئەڤ ھەموو پێڤاژۆ ب ھەڤ رە ھاتنە مەشاندن، دڤێت گەلێ مە بزانە، گەلێ مە ب مە باوەر بکە، ئەم دزانن ئەم چ دکن.
پارلامەنتەرێ دەمێ یێ ئێلھێ ساروحان ئۆلوچ د داخویانیا خوە دە وھا گۆت: “ئەز دخوازم دو ھەڤۆکان لێ زێدە بکم. ب گۆتنا سەلاحەدین دەمیرتاش ئیفادە دکم. گۆت “ئەم یەکن، ئەم ھەموو نە، چ جوداھی د ناڤبەرا مە دە نینە. د ناڤبەرا من و پارتیێ دە جودابوون و جوداھی نینە. یێن کو ھەول ددن رایا گشتی تەڤلیھەڤ بکن ‘بلا چ کەس پارەی نەدەت وان.’ ئەم ب ئەشکەرە دخوازین جارەکە دن ڤێ پەیامێ بگھینن ھەر کەسی.”
د راستیا خوە دە داخوویانیا ڤان ھەردو پارلەمەنتەران ژ زاردەڤێ سەلاحەدین دەمیرتاش چقاس راستە نایێ زانین. دەمیرتاش ب خوە رۆژانە دەما پێوست د مادیا جڤاکی دە دیتنێن خوە دبێژە. لێ ڤێ جارێ ژ سەردانا پارلەمەنتەرێ دەمێ سڕی ساکک یا دەمیرتاش، ئەنجامەک دەرکەت ھۆلێ و ئیرۆ ژی ژ سەردانا ڤان ھەردو پارلەمەنتەران دە ئەنجامەک دن دەرکەت ھۆلێ.
ئێدی راستی ژ خەلکێ نایێ ڤەشارتن، کوردێن د ناڤا دەمێ دە ژ کریارێن چەپێن کەمالیست عاجزن و ئێدی تەحەموول ناکن. ئەڤ یەک ئەشکەرە بوویە و د ناڤا بنگەھێ دەمێ دە ڤەکری تێ گۆتوبێژ کرن.
