وەزیرێ ناڤخوە یێ ھەرێما کوردستانێ رادگهینە، “مە داخواز ژ وەزیرێ بەرەڤانیێ یێ ترکیێ کریە کو گەفێن ل سەر ھەرێما کوردستانێ کێم بکە و ئێدی وەکە جھێ یەکالیکرنا پرسگرێکێن دەرڤە نەیێ بکارانین.”
وەزیرێ ناڤخوەیێ ھەرێما کوردستانێ رێبەر ئەحمەد پشتی جڤینا لگەل وەزیرێ بەرەڤانیێ یێ ترکیێ د کۆنگرەیەکا رۆژنامەڤانی دە راگھاند: “مە جڤینەکا گرینگ لگەل وەزیرێ بەرەڤانیێ یێ ترکیێ یەشار گولەر پێک ئانی. مە بەحسا پێوەندیێن دوئالی یێن د ناڤبەرا ھەرێما کوردستانێ و ترکیێ دە کرن.”
وەزیرێ ناڤخوە گۆت: “مە داخواز کر گەفێن ل سەر ھەرێما کوردستانێ بێن کێمکرن و ئارامی ژ بۆی سینۆران بێ ڤەگەراندن. نابە ھەرێما کوردستانێ وەک جھێ یەکالیکرنا پرسگرێکێن دەرڤە بێ بکارانین.”
رێبەر ئەحمەد گۆت، د سەردانا خوەیا ژ بۆ بەغدایێ دە، وەزیرێ بەرەڤانیێ یێ ترکیێ یەشار گولەر بەحسا ھەڤاھەنگی و پەیوەندیێن د ناڤبەرا ئیراق و ترکیێ دە کر ژ بۆ ئارامی ل سینۆران ھەبە.
سەرۆکوەزیر مەسروور بارزانی ئیرۆ 7 شباتا 2024 دانێ پێش نیڤرۆ پێشوازی ل وەزیرێ بەرەڤانیێ یێ ترکیێ یەشار گولەر و شاندا لگەل کربوو.
سەرۆکوەزیر مەسروور بارزانی ل سەر حەسابا خوە یا “X” نڤیسی: “مە و وەزیرێ بەرەڤانیێ یێ ترکیێ یەشار گولەر تەکەزی ل سەر بەردەوامیا ھەماھەنگیێ ژ بۆ ئارامی و ئاسایشا ھەرێما کوردستانێ، ئیراق و ناڤچەیێ کر.”
سەرۆکوەزیر مەسروور بارزانی گۆت ژی: “ھەرێما کوردستانێ وەک ھەردەم دبە فاکتۆرا ئەولەھی و ئارامیێ و ئەم رێ نادن کو ببە جھێ مەترسیێ ل سەر جیرانێن مە.”
