دەولەمەندیێن باکورێ کوردستانێ ژ ئالیێ دەولەتا ترک ڤە بێ سینۆر تێن تالانکرن. ھەری داوی ژی دەربارێ بەرهەمینانا پەترۆلا گابارێ دە ژ ئالیێ سەرۆکۆمارێ ترکیێ ڤە داخویانیەک ھات دایین. ل گۆری ڤێ داخویانیێ نھا ل گابارێ رۆژانە 35 ھەزار بەرمیلێن پەترۆلێ دهێن بەرھەمانین و ئەڤ یەک رۆژ ب رۆژێ زێدە دبە.
ل چیایێ گابارێ کو بەرێ چەکدارێن پەکەکێ لێ هەبوون و نها رادەستی ترکیێ هاتیە کرن، دەولەتا داگیرکەرا ترک رۆژانە 35 هەزار بەرمیلێن پەترۆلێ بەرهەم تینە.
سەرۆکۆمارێ ترکیێ رەجەب تەییب ئەردۆگان راگهاند: ” تەڤی کو ئۆپۆزسیۆنێ بچووک ددیت، لێ ئیرۆ نەفتا کو ژ بیرا نەفتێ یا ل گابارێ تێ دەرخستن رۆژانە ژ 35 ھەزار بەرمیلان دەرباس بوویە.”
ئەردۆگان راگهاند: “ئارمانجا مەیا سەرەکی ئەوە کو د وارێ ئەنەرژیێ دە ئەم ب تەمامی سەربخوە ببن. ئەم ب وێرەکی و بریارداری گاڤێن ژ بۆ ئەولەھیا ئەنەرژیا ترکیەیێ دهاڤێژن.”
ئەردۆگان هەر وەها راگهاند، “د داویا سالا 2024 دا ئەم دخوازن نەفتا کو ژ گابارێ تێ دەرخستن رۆژانە دەرخن 100 ھەزار بەرمیلان.”
ئەڤ یەک د دەمەکی دە یە کو پەکەکێ ھەیا نها دەھان جاران بۆرییێن نەفتا ھەرێما کوردستانێ تەقاندینە و ب ملیۆنان دۆلاران خسار گهاندیە ئابۆرییا ھەرێما کوردستانێ. لێ پەکەکێ دژی پەترۆلا گابارێ چ گاڤ نەئاڤێتیە ئەڤ ژی تشتەکی پر سەرنجراکێشە.
پەکەکەیا کو ب دەھان سالان چیایێ گابارێ د بن کۆنترۆلا وێ دە بوو، د ڤان سالێن داوی دە ل چیایێن باکورێ کوردستانێ ھەما ھەما بێ باندۆر بوویە. دەولەتا ترک؛ گەلەک جھێن پەکەکێ یێن سالێن 1990 دە دگۆت “ھەرێمێن رزگارکری” وەکە جوودی، گابار، بەستا، چارچەل، ماوا، ئاندۆک کرنە جھێن گەشتوگووزارێ. ئێدی شوونپێیێن گەریلایێن پەکەکێ ژی ل وان دەڤەران نەماینە.
