ئەنجوومەنا نشتمانی یا کوردی ل سووریێ (ئەنەکەسە) رادگھینە، “گرۆپەکە چەکدار یا سەر ب پەیەدێ ڤە، ئەندامێ خوەجهی یێ رۆژئاڤایێ قامشلۆ یێ ئەنەکەسێ تالب حوسێن ئیبراھیم ژ باژارێ قامشلۆ رەڤاند و بەر ب جھەکی نەدیار ڤە بر.”
ئەمینداریا گشتی یا ئەنەکەسێ د داخویانیەکێ دە راگھاند، “گرۆپەکە چەکدار یا گرێدایی پارتیا یەکیتیا دەمۆکراتیک (پەیەدێ) ڤە، ئەندامێ خوەجهی یێ مە ل رۆژئاڤایێ قامشلۆ ب ناڤێ تالب حوسێن ئیبراھیم کو د ھەمان دەمێ دە ئەندامێ پارتیا دەمۆکراتا کوردستانێ – سووریە (پەدەکە-س)ێ یە ژ رۆژا 8 شباتێ ڤە ژ ئالیێ گرۆپەکا چەکدار یا سەر ب پەیەدێ ڤە ھاتیە رەڤاندن.”
ئەنەکەسە د داخویانیا خوە دە ژی، رەڤاندنا ئەندامێ خوە و ھەموو بنپێکرن و کریارێن ترساندنێ یێن کو ژ ئالیێ ڤان چەکداران ڤە تێن کرن شەرمەزار کرن و تەکەز کر کو ئەو ل دژی مافێن ھەری بنگەھین یێن مرۆڤانە.
ھەروھا ئەنەکەسێ داخوازا ئەشکەرەکرنا چارەنڤیسا تالب حوسێن ئیبراھیم و ئازادکرنا وی بلەز کر و بانگ ل رێخستنێن مرۆڤی و ئالیێن ناڤدەولەتی یێن پێوەندیدار کر کو فشارێ بکن، دا کو ئەڤ بنپێکرنێن کو زێدەتر نیگەرانی و نەئارامیێ چێدکن، بێن راوەستاندن.
پێشتر گەلەک ئەندام و ئالیگرێن ئەنەکەسێ و پارتیێن ب سەر وێ ڤە ژ ئالیێ ئاسایش و ھێزێن سەر ب رێڤەبەریا خوەسەر ڤە ھاتنە رەڤاندن و ئۆفیس و بارۆیێن وێ ھاتنە شەوتاندن.
