کۆلبەرەکی دن ژ ئالیێ رەژێما ئیرانێ ڤە هات شەهیدکرن

 کۆلبەرەکی جوانێ خەلکێ باژارێ بانەیا رۆژھلاتێ کوردستانێ، ژ ئالیێ ھێزێن ئەولەھیا ئیرانێ ڤە د مەسافەیەکی نێزیک دە گولـلە لێ ھاتن بەردان و ھات شەھیدکرن.

شەڤا بۆری 11/2/2024 کۆلبەرەکی تەمەن 20 سالی یێ خەلکێ بانە ب ناڤێ سەیوان سەحیحی د دەما کۆلبەریێ یا ل سینۆرێ سارداو یا باژارێ بانە، ب گولـلەیێن راستەراست یێن ھێزێن ئەولەھیا ئیرانێ ھات شەھید کرن.

سەیوان سەحیحی خەلکێ گوندێ بلەکە یێ سینۆرێ بانەیە، تەرمێ وی ئیرۆ ل نەخواشخانەیا سەلاحەدین ئەیووبی یا باژارێ بانە رادەستی مالباتا وی ھاتە کرن.

ل گۆر ئامارێن تۆمارکری یێن سالا 2023 ھەری کێم 22 کۆلبەر ل سینۆرێن کوردستانێ ھاتنە کوشتن و 116 کۆلبەرێن دن ژی بریندار بوونە.