سەرۆکوەزیرێ هەرێما کوردستانێ مەسروور بارزانی ل لووتکەیا جیهانی یا حكوومه‌تان ل دوبەی گۆتارەک پێشکێشی سەرۆک و سەرکردەیێن وەلاتێن رۆژهلاتا ناڤین و جیهانێ كر و تێ ده گۆت: «گەلێ کورد خوەدی داخوازەکە رەوایە ژ بۆ كو چارەنڤیسا خوە دیار بکە».
سەرۆکێ حكوومه‌تا هەرێما کوردستانێ مەسروور بارزانی ئیرۆ دوشەمێ، 12/2/2024 ل لووتکەیا جیهانی یا حكوومه‌تان ل دوبەی گۆتارەکا گرنگ پێشکێش کر و پەیامەک ئاراستەیی هەمی سەرکردەیێن جیهانێ کر و راگەهاند، «کوردان داخوازەکا رەوا ژ بۆ مافێ خوەیێ چارەنڤیسێ هەیە». هەروەسا بال کشاند سەر پرسێن نها یێن ل دەڤەرێ و جیهانێ ژی.
سەرۆکێ حكوومه‌تا هەرێما کوردستانێ هەروەسا گۆت، «ب دیتنا من، ل ڤێ دەرێ چار پێنگاڤ ژ بۆ وێ پێشکەفتنێ هەنە یا کو ئەم هەمی بزاڤێ ژێ رە دکن، ئەو ژی ئەڤن: «سەقامگریا سیاسی، ئەولەهی، پێشکەفتنا ئابۆری و بەرهنگاربوونا گوهەرتنێن ژینگەهێ. ئەڤ چەند پرسێن ئالۆزن، لێ پێدڤیا چارەکرنا وان ژی ب رێبازێن گرێدایی هەر یەک ژ وان هەیە».
سەرۆکوەزیر مەسروور بارزانی د دەرهەقا رێزگرتنا ل مافێن گەلان دە ب رەنگەکێ رۆن پەیامەک ئاراستەیی جیهانێ کر و راگەهاند، «چ ل سەر ئاستێ تاكه‌كه‌سان ئان ژی ل سەر ئاستێ جڤاکێ، چاڤێ گەلێن جیهانێ ل وێ یەکێ یە کو بریارێ ل سەر چارەنڤیسا خوە بدن. مافێ چارەنڤیسێ پالدەرەکێ سەرەکی یە ژ بۆ خوەزایا مرۆڤان، پێدڤیا مە ب دابینکرنا ژینگەهەکێ هەیە کو وەلاتی بکارن تێ دە ب ئاسۆدەیی بژین».
مەسروور بارزانی د پارەکا دی یا گۆتارا خوە دە بەهسا ئارێشەیا فلستینێ ژی کر و راگەهاند، «ئەگەر پێشتر رێز ل مافێن وان یێن بنگەهین هاتبان گرتن، ئالۆزیێن نها چێ نەدبوون». هەروەسا گۆت، «ئەم دکارن ئەینی پێناسەیێ ژ بۆ گەلێ کورد ژی بکن. مە ژی داخوازەکا رەوا ژ بۆ بریاردانێ ل سەر مافێ خوەیێ چارەنڤیسێ هەیە. دۆست و هەڤپەیمانێن مە دانپێدان ب وی مافی کریە، لێ د عەینی دەمێ دە ژ مە رە دبێژن، زەروورەتێن سیاسی ئاستەنگان دخن د رێیا هاریکاریێن وان دە و رێیێ ل دادپەروەریا دیرۆکی دگرن».
