رێخستنا په‌كه‌كێ د چالاكیا خوه ده یا كو ناڤێ كۆمخه‌باتا ژنێن ئێزدی و ئه‌ره‌ب لێكری و ل شه‌نگالێ ل دارخستی گۆت: «فکرێ ئاپۆ وێ ل تەڤاهیا ئیراقێ بێ بەلاڤکرن»!.
په‌كه‌كێ د سالڤه‌گه‌را 25ێ یا ڤه‌گه‌را سه‌رۆكێ خوه عه‌بدوللا ئۆجالان ده بۆ تركیێ و ته‌سلیمبوونا وی وه‌ختا ژ تركیێ ره گۆتی ئه‌ز ژ بۆی خزمه‌تا ده‌وله‌تێ ئاماده‌مه، چالاكیه‌ك ل شه‌نگالێ ل دارخست، 160 ژنێن ئێزدی و ئه‌ره‌ب ته‌ڤلی چالاكیێ كرن و ب ناڤێ كۆمخه‌باتێ چالاكی ل دارخست، ئیرۆ ئه‌ڤ چالاكی ب داوی بوو و په‌كه‌كێ ل سه‌ر ناڤێ ڤان ژنان گۆت: «ئه‌مێ فكرا ئاپۆ ل ته‌ڤاهیا ئیراقێ و مووسلێ به‌لاڤ بكن»!!.
په‌كه‌كێ د كۆمخه‌باتا ژنێن ئێزدی و ئه‌ره‌ب ده وه‌كه راگهاندی بریار دا كو ئینیسیاتیفەکە هەڤبەش بێ ئاڤاکرن و ژ بۆ بەلاڤکرنا فکرێن ئۆجالان ل تەڤاهیا مووسل و ئیراقێ کار بێ کرن.
تشتا نه‌بالكێش د كۆمخه‌باتێ ده ئه‌ڤ بوو كو په‌كه‌كێ دیسا ل پشت ڤان ژنان خوه ڤه‌شارتبوو و ب ده‌ڤێ وان گۆت: «ب ژن، ژیان، ئازادی، ئەمێ ئازادیا فزیکی یا ئاپۆ مسۆگەر بکن»! ئه‌ڤ یێك ل ده‌مه‌كی یه كو ئۆجالان د ئیمرالیێ ده رازایه، تام ته‌سلیم بوویه و ت ته‌جرید و ئیشكه‌نجه ل سه‌ر وی تونه، به‌ره‌ڤاژی هه‌ر چ تشته‌كی خوه‌شه شریكا وی ده‌وله‌تا ترك ژێ ره دابین دكه.
ئۆجالان ل ده‌ما ڤه‌گه‌را خوه بۆ تركیێ ل 15 سباتا 1999ان هێژان د بالافرێ ده ژ ئه‌فسه‌رێن ترك ره گوت: «دییا من تركه»، پشتره ل مه‌حكه‌مێ گۆت: «ئه‌ز ژ بۆی خزمه‌تا تركیێ ئاماده‌مه».
ئه‌ڤ هه‌لوه‌ستێن ئۆجالان بوون سه‌ده‌ما به‌رته‌كێن مه‌زن د ناڤا كوردان ده و ب ده‌هان كادرۆیێن په‌كه‌كێ یێن وه‌لاتپارێز ب ڤێ سه‌ده‌مێ ژ په‌كه‌كێ قوتبوون، په‌كه‌كه ژی ژ وێ ده‌مێ ڤه ناڤێ كۆمپلۆیێ ل ڤه‌گه‌را ئاپۆ كریه و ته‌سلیمبوونا وی ژی ب به‌خوه‌دانا ناڤ دكه، لێ یا راست ته‌كانه به‌خوه‌دانا ئاپۆ ئه‌و بوو ده‌ما گۆتی: «ل من نه‌خن دیا من تركه».
قه‌ی كریزا شه‌نگالێ ئاپۆیه؟
ژ رزگاركرنا شه‌نگالێ و هه‌یا رۆژا مه یا ئیرۆ په‌كه‌كێ خوه ل ور ئاسێ كریه، ئه‌ڤ یێك بوویه سه‌ده‌م كو ب هه‌زاران ئاواره‌یێن شه‌نگالێ كو هێژان د كامپان ده ڤه‌نه‌گه‌رن وارێ خوه و شه‌نگال ژی وێران بمینه، په‌كه‌كێ پشتره گۆت: «شه‌نگال به‌شه‌كی ئیراقێ یه و ت ئه‌له‌قه‌یا وێ ب كوردستانێ ڤه تونه».
په‌كه‌كه ل ور شیرازا جڤاكا ئێزدی خه‌راب كریه، زراره‌كه مه‌زن دده ئێزدیان و وان بكارتینه، ژ ئێش و ئازارێن وان سۆدێ وه‌ردگره، ڤێ رێخستنێ ب قاسی داعشێ كه‌چ و خۆرتێن ئێزدی دا نه كوشتن، لوما ژی دڤێ ئێزدی و شێنیێن شه‌نگالێ بزانن كریزا شه‌نگالێ ب فكرا ئاپۆ چاره‌سه‌ر نابه، شه‌نگال ب زكمه‌زنێ ئیمرالیێ ئاڤه‌دان نابه، دڤێ بزانن په‌كه‌كێ ئیرۆ ب فیتا نیزاما ئیرانێ و ملیسێن وێ یێن حه‌شدا شه‌عبی شه‌نگال داگیركری یه.
