سەرۆککۆمارێ ترکیەیێ رەجەب تەییب ئەردۆگان رادگھینە، “ئەگەر یەنەکە دەست ژ پشتەڤانیا پەکەکێ، یەپەگێ و پەیەدێ بەرنەدە، ئەم دێ ھەتا داویێ دەریێن خوەشبینیێ بگرن.”
ئەردۆگان ئیرۆ 15 شباتێ د کۆنفەرانسەکا رۆژنامەڤانی دە راگھاند، ترکیە دۆستێ دۆستێن خوەیە. سەردانێن ل پەی ھەڤێن وەزیرێن دەرڤە، وەزیرێ بەرەڤانیێ و سەرۆکێ دەزگەھا ئیستخباراتا ترکیێ بۆ ئیراقێ، بوونە سەدەما راکرنا ئاتمۆسفەرا نەرێنی کو ھەبوو و ھندەک گەشەدانێن باش د ناڤبەرا حکوومەتا ناڤەندی یا ئیراقێ و ھەرێما کوردستانێ دە چێبوون.
ئەردۆگان وھا گۆت: “ئەم ئامادە نە کو لگەل جیرانێن خوە ھەر جورە گاڤان باڤێژن، ب شەرتێ کو تەرۆریست ل سەر سینۆرێن مە چێنەبن. کەس وەکی مە رێزێ ل یەکپارچەبوونا ئاخا ئیراق و سووریەیێ ناگرە.”
ھەروھا گۆت: “لێ یەنەکە ل سەر ڤێ پرسێ خوەدی ھەلوەستەکا نەرێنییە و وان ل سەر ڤێ پرسێ گەلەک جاران ھشیاری دانە یەکتیێ و گۆتنە: ئەم ل ڤر ھن پێکھاتنێن نوو دبینن. دەرفەتێ نەدن ڤان. ئەگەر نا، ھوون دێ ب تەنێ بمینن. یەکیتی دگەل ھەموو ھشیاریێن مە، پشتگریا پەکەکێ و یەپەگێ دکە.”
ئەردۆگان گۆت ژی: “ئەگەر یەنەکە دەست ژ پشتەڤانیا پەکەکێ، یەپەگێ و پەیەدێ بەرنەدە، ئەم دێ ھەتا داویێ دەریێن خوەشبینیێ بگرن.”
ئەڤ نە جارا یەکێیە کو ترکیە بەرپرسێن یەنەکێ ب پشتەڤانیا پەکەکێ تۆھمەتبار دکە. ترکیە زێدەتری سالەکێ یە قادا خوە یا ئاسمانی ل سەر فرۆکخانەیا ناڤدەولەتی یا سلێمانیێ گرتیە.
