سەرۆکێ ھەرێما کوردستانێ نێچیرڤان بارزانی گۆت کو، “ئەم ب ھەر ئاوایی بکارئانینا خاکا خوەیا ژ ئالیێ پەکەکێ ڤە ل دژی ترکیەیێ رەد دکن”.
نێچیرڤان بارزانی د ھەڤپەیڤینا خوە یا لگەل کانالێن ئەل-عەرەبیە و ئەل-حەدەس دە داخویانیێن گرینگ دان.
نێچیرڤان بارزانی، دیار کر کو کێشەیێن نھا ژ سەردەما داعشێ دژوارترن، ژ بەر کو ئەنیا شەر نە دیارە و ھەروھا پەسنێ رۆلا سەرۆکوەزیرێ ئیراقێ محەمەد شیاع سوودانی ژی دا، داخواز ژ حکوومەتا ئیراقێ ژی کر کو د وارێ پاراستنێ دە رۆلەک ئەکتیف بلیزە.
سەرۆک بارزانی بالکشاند سەر وێ یەکێ کو ھەرێما کوردستانێ ژی وەک بەشەک ژ ئیراقێ دێ بریارێ ل سەر ھەبوونا ھێزێن ھەڤپەیمانیا ناڤدەولەتی بدە. ھەروەھا دیار کر کو چ پێوەندیەک د ناڤبەرا ئیسرایل و ھەرێما کوردستانێ دە نینە و گۆت: “چ پەیوەندیێن مە لگەل ئیسرایلێ نینن و چ بارەگەھا مۆئسادا ئیسرایلێ ل ھەرێما کوردستانێ نینە، ژ بەر وێ ژی پرۆپاگاندایێن ئیرانێ یێن د دەربارێ ھەبوونا مۆئسادێ ل ھەرێما کوردستانێ نە راستن. ھەروھا تەھرانێ چ بەلگەیەک د دەربارێ ھەبوونا مۆئسادێ ل ھەرێما کوردستانێ نەدایە بەغدایێ.”
نێچیرڤان بارزانی تەکەزی ل سەر وێ یەکێ کر، کو ھەرێما کوردستانێ نە جھێ مەترسیا ل سەر ئیرانێ یە، ژ بەر وێ ژی بۆمبەباران و ئێرشێن مووشەکی یێن ئیرانێ کو دبن سەدەما مرنا سڤیلان، نکارن د چارچۆڤەیا دۆستانیێ دە بێن دانین.
نێچیرڤان بارزانی ھەروەھا گۆت: “ھەرێما کوردستانێ دترسە کو بەغدا نکاربە خوە بپارێزە، ژ بەر وێ ژی دڤێت سینۆرەک ژ بۆی گرۆپێن ملیسێن ئیراقێ بێ دانین.”
نێچیرڤان بارزانی بەحسا پەیوەندیێن ناڤبەرا ھەرێما کوردستانێ و ترکیێ ژی کر و گۆت: “ئەم ئێریشێن کو ژ ئالیێ پارتیا کارکەرێن کوردستانێ (پەکەکێ)ڤە ل دژی ترکیێ تێن کرن رەد دکن. ژ بەر کو پەکەکە ژ بۆ جیرانێ مە جھێ مەترسیێ یە و ڤێ رەوشێ ھەم ژ بۆ مە ھەم ژی ژ بۆ بەغدایێ ئالۆزیەک مەزن چێکریە”.
