سەرۆکێ ھەرێما کوردستانێ نێچیرڤان بارزانی د چارچۆڤەیا کۆنفەرانسا ئاساییشێ یا مونشەنێ دە، لگەل سەرۆککۆمارێ ئازەربایجانێ ئیلھام عەلیێڤ جڤیا و ھەردو ئالیان تەکەزی ل سەر پێشخستنا پەیوەندیێن ناڤبەرا ھەولێر و باکویێ دە کرن.
سەرۆکێ ھەرێما کوردستانێ نێچیرڤان بارزانی د دویەمین رۆژا کۆنفەرانسا ئاساییشا مونشەنێ دە، د ھەڤدیتنەکێ دە پیرۆزباھی ل سەرۆکێ ئازەربایجانێ ئیلھام عەلیێڤ کر ژ بەر کو جارەکە دن وەکە سەرۆکێ نوویێ وی وەلاتی ھات ھلبژارتن. ھەر دو ئالیان تەکەز ل سەر وێ یەکێ ژی کرن کو ژ بۆ پێشخستنا پەیوەندی و ھەڤکاریا د ناڤبەرا ئازەربایجان و ئیراق و ھەرێما کوردستانێ دە، گاڤێن پێویست بێن ئاڤێتن.
دەربارێ ڤەکرنا کۆنسولخانەیا گشتی یا ئازەربایجانێ ل ھەولێرێ دە ژی، سەرۆکێ ھەرێما کوردستانێ ژ سەرۆککۆمارێ ئازەربایجانێ رە راگھاند، ئەو دێ ببە ئالیکار ژ بۆ زێدەتر پێشخستنا پەیوەندیان.
عەلیێڤ ھەروھا نێچیرڤان بارزانی ڤەخوەند کۆنفەرانسا نەتەوەیێن یەکبوویی یا ژ بۆ گوھەرتنا ئاڤ و هەوایێ (COP29) کو بریارە ئیسال ل ئازەربایجانێ بهێت لدارخستن.
ھلبژارتنێن سەرۆکاتیا ئازەربایجانێ رۆژا 7 ڤێ مەھێ ھاتن کرن و ئیلھام عەلیێڤ ب رێژەیا ژ سەدی 92 یا دەنگان ژ بۆ جارا پێنجەمین وەک سەرۆکێ وی وەلاتی ھات ھلبژارتن.
