سزایێ دارڤەکرنا گرتیەکی کورد و خەلکێ سەلماسێ یێ ب ناڤێ ئیرەج پاکی کو بەریا نها ب تۆهمەتا پێوەندیدار ب مادێن هشبەر ب ئیدامێ هاتبوو سزادان، ل گرتیگەها ناڤەندی یا ئەردەبیلێ ب رێ ڤە چوو.
ل گۆری سازیا مافێ مرۆڤی یا هەنگاوێ، سبێدەها رۆژا دوشەمی 19ێ شباتا 2024ان، سزایێ دارڤەکرنا گرتیەکی کوردێ ب ناڤێ ئیرەج پاکی یێ خەلکێ گوندێ “ستوونرەش”ێ سەر ب سەلماسێ، ل گرتیگەها ناڤەندی یا ئەردەبیلێ هاتە جیبجیکرن.
ل گۆری گۆتنا چاڤکانیەکە ئاگەهدرا، ئیرەج پاکی شەش سال بەریا نها ب تۆهمەتا پێوەندیدار ب مادێن هشبەر هاتبوو گرتن و ژ ئالیێ دەزگەها دادوەری یا کۆمارا ئیسلامی یا ئیرانێ ڤە ب ئیدامێ هاتبوو سزادان.
هەتا دەما بەلاڤبوونا ڤێ نووچەیێ، نووچەیا دارڤەکرنا ڤی گرتیێ د مەدیایێن حکوومەتی و ب تایبەتی مەدیایێن نێزی دەزگەها دادوەریێ دە نەهاتیە بەلاڤکرن.
