پارتیا ماف و ئازادیان (ھاک پار) ژ بۆ ھلبژارتنێن 31 ئادارێ یێن شارەداریان، ل 81 باژارێن ترکیێ و باکورێ کوردستانێ، کاندیدێن خوە دەرخستن. د ڤێ پێڤاژۆیا ھلبژارتنێ دە بزاڤا ئازادی و ھاک پارێ تفاقا خوە یا سیاسی ژی راگھاند و بانگ ل ھەموو پارتیێن کورد ھات کرن کو د رێیا ھاک پارێ دە بمەشن دا کو ماف و ئازادیێن گەلێ کورد بێن بدەستخستن.
سەرۆکێ گشتی یێ ھاک پارێ دوزگون کاپلان، ئیرۆ 20/2/2024 دگەل کاندیدێن خوە یێن شارەداریێن دیاربەکرێ و نوونەرێن بزاڤا ئازادی کو هەڤپەیمانیا ھلبژارتنێ کرنە دە داخویانیەک دا چاپەمەنیێ. د داخویانیێ دە ھات دیارکرن کو ھاک پارێ ل 81 باژارێن ترکیێ و باکورێ کوردستانێ کاندیدێن شارەداریان و ل 6 ناڤچەیان ئەندامێن مەجلسێن شارەداریان دەرخستنە. سەرۆکێ ھاک پارێ دا زانین کو د دیارکرنا کاندیدان دە وان حەساسیەتا نوونەرتیا ژنان ژی بەر چاڤان گرتیە و ژ ڤان کاندیدان 27 ژێ کاندیدێن ژنن.
سەرۆکێ ھاک پارێ ب بەردەوامی دیار کر کو ل ترکیێ ب گشتی 140 پراتیێن فەرمی ھەنە و ژ ڤان پارتیان لگەل ھاک پارێ تەنێ 36 پارتی دکارن تەڤلی ھلبژارتنان ببن. ھەر وھا ئاماژە ب وێ یەکێ ژی کر کو ژ ڤان پارتیان تەنێ ھاک پار ل سەر پرسگرێکا کورد ھەولا چارەسەریێ ددە. ب رێیا ڤێ داخویانیێ ھات دیارکرن کو وان وەکی ھاک پارێ خوەستیە کو کورد بێ ڤەبژێرک نەمینن، لەورا پرسا کورد پرسا رۆژھلاتا ناڤینە و بلا کورد ھەر دەم بزانبن کو ھاک پار ژ بۆ چارەسەرکرنا ڤێ پرسێ ئامادەیە.
نوونەرێن بزاڤا ئازادی کو ھەڤپارێ هەڤپەیمانیا سیاسی یێ ھاک پارێیە ژی ل داخویانیێ جھێ خوە گرتن. بەردەڤکێ بزاڤا ئازادی مەتین پیرانی ژی ب تایبەتی بانگ ل پارتیێن کورد کر و گۆت کو بلا ھەموو پارتی د رێیا ھاک پارێ دە بمەشن دا کو ئەم بکاربن ماف و ئازادیێن گەلێ کورد ب رێک و پێک بینن زمێن و ل رێیێن چارەسەریا ماییندە بگەرن.
