کۆنسولخانەیا ئامەریکایێ یا ل هەولێرێ دەربارێ کێمبوونا بەرچاڤ یا بنپێکرنێن ئازادییا رۆژنامەڤانیێ، دەستخوەشیێ ل حکوومەتا هەرێما کوردستانێ دکە.
کۆنسولخانەیا گشتی یا ئامەریکا ل هەولێرێ د داخویانیەکێ دە راگهاند، «هژمارەک راپۆرتێن سالانە یێن ناڤەندێن چاڤدێرییا ئازادییا رۆژنامەڤانیێ ل هەرێما کوردستانێ، کێمبوونا بنپێکرنا ئازادییا رۆژنامەڤانیێ ژ سالا 2022 هەتا 2023 نیشان ددن، د ناڤ دە ژی گرتنا رۆژنامەڤانان کێم بوویە».
د داخویانیێ دە هات گۆتن، «دیتنا ڤێ گوهەرتنێ، جهێ هاندانا مەیە و دەستخوەشیێ ل حکوومەتا هەرێما کوردستانێ دکن ژ بۆ هەولێن وێ یێن هەتا نها ژ بۆ باشترکرنا ژینگەها مەدیا و راگهادنێ».
کۆنسولخانەیا ئامەریکایێ دبێژە: «ژ بۆ باشترکرنا شیانا حکوومەتا هەرێما کوردستانێ ژ بۆ بەرسڤدانا پرسێن مەدیایی یێن گونجاو د دەما خوە دە، ئەم کار دکن کو بەردەڤکان ژ ئاژانسێن جودایێن حکوومەتا هەرێما کوردستانێ بشینن ئامەریکایێ، دا کو باشتر تێبگهن کا ئۆفیسێن مەدیایی یێن حکوومەتا مە چاوا کار دکن».
کۆنسولخانەیا گشتی یا ئامەریکایێ ل هەولێرێ راگهاند، دەربارێ کێمبوونا بنپێکرنا ئازادیا چاپەمەنیێ و گرتنا رۆژنامەڤانان ل هەرێما کوردستانێ، پشت ب راپۆرتا ناڤەندا مەترۆ ڤە گرێ دایە.
کۆنسولخانەیا گشتی یا ئامەریکایێ چەندین جارن ل سەر کێمبوونا بنپێکرنا ئازادییا رۆژنامەڤانیێ، دەستخوەشی ل حکوومەتا هەرێما کوردستانێ کریە.
کۆنسولخانەیا گشتی یا ئامەریکایێ رۆژا 14ێ سباتێ ژی ل هەولێرێ تەڤلی مەراسیمێن بەلاڤکرنا راپۆرتا سالانە یا رێکخستنا پەیامنێران یا مافان و پێشکەفتنێ بوو و پێشوازی ل کێمبوونا رێژەیا بنپێکرنا ئازادیا راگەهاندنێ ل هەرێما کوردستانێ کربوو.
