پارتییا وەلاتپارێزێن کوردستانێ (PWK) ئیرۆ ب پەیامەکێ 21ێ سباتێ، رۆژا زمانێ زکماکی پیرۆز کر و تێ دە گۆت: «دڤێ بەری هەر تشتی، مالباتێن کوردان د مالێ دە ب زارۆکێن خوە ب زمانێ کوردی بپەیڤن و ڤێ یەکێ وەکە وەزیفەیەکە نەتەوەیی ببینن».
پەیاما بورۆیا راگهاندنێ یا PWK:
21ێ سباتێ رۆژا زمانێ زکماکی یا ناڤنەتەوەیی پیرۆز بە!
رۆژا 21ێ سباتێ ل جیهانێ ژ ئالییێ یۆنسكۆیێ ڤە وەک رۆژا زمانێ زکماکی یا ناڤنەتەوەیی هاتییە قەبوولکرن.
د جیهانێ دە، زمانەکی هەری زێدە تووشی زلم، زۆرداری و نەهەقییێ بوویە و ئیرۆ ژی ب ئاواکی دژوار و نەمرۆڤی د ئاشێ ئاسیمیلاسیۆنێ دە تێ هێراندن، بێ گومان زمانێ کوردی (کورمانجی و زازاکی/کردکی) یە.
ل باکورێ کوردستانێ و ل ترکیەیێ، هەر چقاس ل گەل هەموو ئاستەنگییان دەرسا بژارتە یا کوردی هەبە ژی د دەربارێ پەروەردەیێ و د وەشانگەرییا تەلەفیزیۆنێ دە هنەک گاڤێن ئەرێنی هاتبن ئاڤێتن ژی؛ مخابن هینا ژی وەک فەرمی د قانوونا بنگەهین و یاسایێن پەیوەندیدار دە، ل پارلامەنتۆیا ترکیەیێ، زمانێ کوردی تونە تێ حهسابكرن. هینا ژی زمانێ کوردی نە زمانەکی فەرمییە. هینا ژی پەروەردەیا ب زمانێ کوردی نەهاتییە قەبوول کرن.
ب سیاسەتا دەولەتا ترکیەیێ یا ب دەهان سالانە هاتیە مەشاندن، ب ملیۆنان کورد ل باکورێ کوردستانێ و ل ترکیەیێ نکارن و نزانن ب زمانێ دایکا خوە باخڤن. ئەڤ تراژەدی و تراڤمایەکە مەزن و کوورە؛ یێن بوونە سەبەبێ ڤێ یەکێ، فائیلێ تاوانا مرۆڤاهیێ نه.
دڤێ ل هەمبەری ڤێ سیاسەتا ئاسیملاسیۆن و ژەنۆسیدا ل سەر زمانێ کوردی، هەموو کوردێن ل باکورێ کوردستانێ و ل ترکیەیێ د دەربارێ ئاخافتن، فێربوونا کوردی دە ل بەر خوە بدن و بەرنامەیێن تایبەتی پێک بینن.
دڤێ بەری هەر تشتی، مالباتێن کوردان د مالێ دە ب زارۆکێن خوە ب زمانێ کوردی بپەین و ڤێ یەکێ وەکە وەزیفەیەکە نەتەوەیی ببینن.
دڤێ مالباتێن کوردان ژ بۆ زارۆکێن خوە دەرسا بژارتە یا کوردی (کورمانجی و زازاکی/کردکی) هلبژێرن.
