شه‌ش چه‌كدارێن په‌كه‌كێ هاتن كوشتن

 وه‌زاره‌تا پاراستنێ یا تركیێ راگهاند كو د ئێریشه‌كه‌ ئاسیمانی ده‌ 6 چه‌كدارێن په‌كه‌كێ ل هه‌رێما كوردستانێ بوونه‌ ئارمانج، ئه‌ڤ یێك ل ده‌مه‌كی تێ كو دوهـ بالافرێن جه‌نگێ یێن تركیێ گونده‌كی دینارتێ بۆمبه‌باران كرن و 2 وه‌لاتی شه‌هید كرن.

ئاژانسا ئه‌نادۆلو یا ده‌وله‌تا تركیێ ئیرۆ رۆژا چارشه‌می 21\2\2024 به‌لاڤ كر كو د ئێریشه‌كه‌ ئاسیمانی ده‌ 6 چه‌كدارێن رێخستنا په‌كه‌كێ ل هه‌رێما ئۆپه‌راسیۆنا په‌نجه‌ كلیتێ بوونه‌ ئارمانج و هاتنه‌ كوشتن.

وه‌زاره‌تا پاراستنێ یا تركیێ جیهێ كو ئێریشێ لێ پێكهاتی ئاشكه‌ره‌ نه‌كر و ته‌نێ گۆتیه‌ كو ل هه‌رێما په‌نجه‌ كلیتێ بوویه‌.

ئه‌ڤ داخویانیا وه‌زاره‌تا پاراستنێ یا تركیێ ل ده‌مه‌كی تێ، ئێڤارا دوهـ رۆژا سێشه‌می 20\2\2024ێ بالافرێن جه‌نگێ یێن تركیێ گوندێ كافیا یێ ناحیه‌یا دینارتێ ل قه‌زایا ئاكرێ بۆمبه‌باران كر و ب وێ سه‌ده‌مێ دو وه‌لاتیێن ده‌ڤه‌رێ شه‌هید كه‌تن و دو بریندار بوون.

ژ پاش سالا 2015ێ رێخستنا په‌كه‌كێ ب ئاوایه‌كی سیستماتیك شه‌رێ خوه‌ ژ ناڤچه‌یێن سینۆری ڤه‌گوهه‌ستیه‌ ناڤا گوند و دۆربه‌را باژارۆكێن باشوورێ كوردستانێ و ب ڤێ سه‌ده‌مێ ئه‌ڤ گوند ده‌وام دكه‌ڤن به‌ر ئێریشێن ئاسیمانی و ب ده‌هان وه‌لاتیێن سڤیل ژ وێ ده‌مێ ڤه‌ ب وان ئێریشان شه‌هید و بریندار بوونه‌.