رۆژنامەڤانەکی ناڤدار یێ رۆژھلاتێ کوردستانێ ب توندی رەخنە ل سەرۆکێ یەنەکێ بافل تالەبانی کر و گەفا وێ یەکێ ژی خوار کو بەلگەیێن ل دژی وی دێ بدە کۆنگرەیا ئامەریکایێ و دێ وی ب وێ یەکێ تۆمەتبار بکە کو وەک فەرماندارەکی ھێزا قودسا سەر ب سپاھێ پاسدارێن ئیرانێ رەفتار دکە.
پشتی شەڤا بۆری گۆتەگۆتێن دۆرپێچا کامپا ئازادی یا حزبا دەمۆکراتا کوردستانا ئیرانێ بەلاڤ بوون، رۆژنامەڤانێ رۆژھلاتێ کوردستانێ عەلی جەوانمەردی د تۆرا خوە یا جڤاکی فەیسبۆکێ دە وەشانەکا زندی بەلاڤ کر و راگەھاند: “یەنەکێ ھێز شاندیە سەر کامپا ئازادی و ب رێیا کۆمپانیایەکی ڤە دخوازە کامپا ئازادی دیواربەند بکە. مژار تەنێ حزبا دەمۆکرات نینە و بەرنامەیەک ژ بۆ کۆمەلا زەحمەتکێشان ژی ھاتیە دانین. فەوجەکا لیوایا 712، فەوجەکا بەرەڤانی و ھەوارچوون، فەوجەکا ھێزێن کۆیێ ل کۆیێ و ھێزەکا سکێرتاریەتا بافل تالەبانی چوونە سەر کامپا ئازادی و کەتنە رەوشا ئامادەباشیێ و ب ناڤێ بەرەڤانییا ل دژی داعشێ چوونە دەڤەرێ، لێ ژ ئالیێ دن ڤە داعش ل کۆیێ چ دکە؟”
جەوانمەردی گۆت: بافل تالەبانی وەک سەرۆکێ یەنەکێ ب کریار بوویە فەرماندارەکی ھێزا قودسا ئیرانێ. ھێزەکا حەشدی شەعبی کو سەر ب قەیس خەزعەلی یە، خوەستیە بنکەیێن ل زرگوێز داینن و ئانینە وێ دەڤەرێ. لێ خەلکێ ناڤچەیێ ترسیان و د مەدیایێ دە دەنگ ڤەدا، ژ بەر وێ ژی د جیھا وان دە ھێزەکا ئاساییشێ ھاتن بجیھ کرن. ھێزا حەشدا شەعبی ژی کو ھێزەکا قودسا سەر ب سپاھا پاسداران ل گەل وانە، ڤەگەراندن بۆ ناڤچەیا شارەزۆر و د ناڤ بنکەیێن لیوایا پاسەوانێن سینۆر دە ھاتنە بجیھ کرن.
جەوانمەردی دبێژە: “ئەڤ رەوشا ل کۆیێ پێکتێ، چارەنڤیسسازە. تشتا بافل تالەبانی کریە، ژن و زارۆکێن کامپێن حزبا دەمۆکرات بریارە ب دیوار دۆرپێچ بکە و ب کامیرا بخن بن چاڤدێری. پلان و تشتا تێ کرن وەک ل کامپا ئەشرەفا ل ھەمبەر موجاھیدین خەلق ھاتیە کرنێ یە، پشترە ژی سڤکاتی ب وان کرن و ژ وان کوشتن و دەرخستن.”
ھەرواھا گۆت، ئەم دزانین رەوشا پەیوەندیێن یەنەکێ و ئیرانێ چاوایە، بافل تالەبانی دخوازە وەک فەرماندارەکی ھێزا قودس ب ھەموو شیانا خوە ڤە ھەولا ژناڤبرنا خەباتێن رۆژھلاتێ کوردستانێ بدە. لێ بافل تالەبانی و ھندەک خەلکێ ناڤ یەنەکێ دە خوە فرۆتنە، ھەتا داویێ وھا ژ بۆ وان ناچە سەری. داخواز ژ جوانێن ناڤ رۆژھلاتێ کوردستانێ دکم ھەلوێست ھەمبەر جەحشبوونێ وەرگرن و قەبوول نەکەن.
عەلی جەوانمەردی گۆت: “گەلەک بەلگە ل سەر سپیکرنا پارە ژ بۆ سپاھا پاسداران، ل سەر دەرباسکرنا زێر بۆ سپاھا پاسداران، ل سەر ھەڤکاری کرنا ل گەل سپاھا پاسداران و حزبوللاھا لوبنانێ بۆ قاچاخچیتییا مادەیێن ھشبەر ھەنە و ئەم دێ وان بەلگەیان بگەھینن کۆنگرەیا ئامەریکایێ.”
جەوانمەردی گۆت، ھەرچەند یەنەکە وسا نیشان ددە کو ھەڤکارێ ئامەریکایێ یە، لێ ئەو نەراستە، ئەو ھەڤکارێ سپاھا پاسدارانن. ئەم ژی دێ ب بەلگەیان ڤە بۆ کۆنگرەیا ئامەریکایێ ڤێ ئیسپات بکن. دڤێت ب یەکگرتی دژی ئەنیا بەرخوەدانێ راوەستن. ئەو چەکێن دەستێ پێشمەرگە دە ئەگەر ژ بۆ بەرەڤانی ل خوە کرنێ نەبە، ژ بۆ چیە؟ دبە ناڤ ھێزێن یەنەکێ دە کەسێن دلسۆز و کوردپەروەر ھەبن، لێ ب رێڤەبەریەکی کرێگرتی ڤە گرێدایینە.
