پارتیا وەلاتپاریزێن کوردستانێ: ئەم ئێریشێن ل سەر باشوور و رۆژئاڤایێ کوردستانێ شەرمەزار دکن

 پارتییا وەلاتپارێزێن کوردستانێ (PWK) د داخویانیەکێ دە ئێریشێن ترکیێ ل ناڤچەیێن سینۆری یێن ھەرێما کوردستانێ و رۆژئاڤایێ کوردستانێ شەرمەزار کر.

داخویانیا نڤێسینگەها راگەھاندنێ یا PWK وەهایە:

د ئەنجاما ئێریشێن بالافرێن دەولەتا ترکییێ دە، ل گوندێ کافییایێ یێ سەر ب باژارێ دھۆکێ، دو گوندییێن سڤیلی یێن ب ناڤێ عارف تاھا و بەشیر عۆمەر ھاتنە قەتل کرن.

ئەڤ ئێریش نە ئێریشا یەکەمە و مخابن وەھا خویایە کو دێ نەیا داوی ژی بە. ل گۆری ئاگاھدارییێن ھەیی، دەولەتا ترکیێ د سالا 2023 دە ژ 1500 جاران زێدەتر ئێریش برنە سەر باشوورێ کوردستانێ. ھەروەھا ل گۆری ڤان ئاگاھدارییێن ھەیی، د ئەنجاما ڤان ئێریشێن کو پرانییا وان ل سەر دۆر و بەرا باژارێ دھۆکێ ھاتنە کرن دە، ژ سالا 2015 ھەتا ئیرۆ، 152 سڤیل ھاتنە کوشتن، 228 سڤیل ژی بریندار بوونە، ب دەھان گوند ھاتنە وێران کرن.

پەکەکە ژی ب چالاکییێن خوە یێن ل باشوورێ کوردستانێ، ھەم دەستھلاتدارییا رێڤەبرییا ھەرێما فەدەرە یا باشوورێ کوردستانێ ناس ناکە، ھەم ژی رێ ژ بۆی ڤان ئێریشێن دەولەتا ترکیێ خوەش دکە.

دەولەتا ترکیێ دەمەکێ درێژە کو ب بالافر و درۆنان ئێریشان دبە سەر باشوور و رۆژئاڤایێ کوردستانێ و د ئەنجاما ڤان ئێریشان دە گەلەک سڤیل تێنە قەتلکرن.

ئەم ھەموو ڤان ئێریشان و قەتلکرنا کوردێن سڤیل شەرمەزار دکن.

ئاشکەرەیە کو د ئەنجاما ئێریشێن ئارتێشا دەولەتا ترکیێ یێن ل سەر رۆژئاڤایێ کوردستانێ ژی ب سەدان سڤیل ھاتنە کوشتن و بریندار کرن.

دڤێت دەولەتا ترکیێ داویێ ل ڤان ئێریشێن خوە و قەتلکرنێن سڤیلان بینە.

ئەم ڤێ ئێریشا داوی کو ل گوندێ کافییایێ یێ سەر ب باژارێ دھۆکێ ھاتییە کرن کو بوویە سەبەبێ قەتلکرنا دو کوردێن سڤیل و ھەموو ئێریشێن ل سەر سڤیلان تێنە کرن شەرمەزار دکن.

حکوومەتا ھەرێما کوردستانێ، بەغدا و نەتەوێن یەکبوویی ژی دڤێت ل ھمبەری ڤان ئێریشێن ل سەر باشوورێ کوردستانێ زێدەتر بێدەنگ نەمینن و ھەلوەستێ بگرن و دڤێت ژ بۆ رێ ل بەر ئێریش و کۆمکوژیێن ب ڤی رەنگی بێنە گرتن، گاڤێن ئەنجامگر باڤێژن.

22/2/2024

نڤێسینگەها راگەھاندنێ یا پارتییا وەلاتپارێزێن کوردستانێ (PWK)