ل سەر سینۆرێن رۆژھلاتێ کوردستانێ یێ نەوسوود سێ کۆلبەر ب گولـلەیێن راستەراست یێن ھێزێن ئیرانێ بریندار بوون و کۆلبەرەکی دن ژی ل سینۆرێ بەستام یا باژارێ سەقزێ ب گولـلەیا راستەراستا ھێزێن کۆمارا ئیسلامی یا ئیرانێ ڤە بریندار بوون.
کۆمەلەیا مافێ مرۆڤ یا ھەنگاوێ د ڤێ دەربارێ دە راگەھاند، شەڤا چارشەمبێ، سێ کۆلبەر کو ناڤێ دو ژ وان فوئاد کارگەر، خەلکێ گوندێ بانەوەرەیێ پاوە و نشتەجھێ باژارێ جوانرۆ و سوھەیب کو پاشناڤێ وی نە دیارە ل گەل کۆلبەرەکی دن ب گولـلەیێن راستەراست و لێدانا کەڤران ژ ئالیێ ھێزێن ئیرانێ ڤە ل سینۆرێ نەوسوود یێ پاوە ب گرانی بریندار بوونە.
کۆمەلەیا مافێ مرۆڤ یا ھەنگاو دیار کر، فوئاد کارگەر ژ بەر گرانیا برینا خوە ژ بۆ نەخوەشخانەیا باژارێ پاوە ھاتیە ڤەگوھەستن و پشترە ژی ژ بۆ نەخوەشخانا تالقانی یا باژارێ کرمانشانێ ھاتیە راکرن و نھا د ژێر چاڤدێریا ھوور یا پزیشکان دەیە و رەوشا وی یا تەندوروستیێ خرابە.
د ھەمان دەمێ دە، کازم عۆسمانی یێ تەمەن 28 سالی و خەلکێ باژارێ سەقیزێ یە، د دەما کۆلبەریێ دە ل سینۆرێ بەستام یێ سەقزێ ب گولـلەیێن راستەراست یێن ھێزێن کۆمارا ئیسلامی یا ئیرانێ بریندار بوویە و ژ بۆ نەخوەشخانەیا شەفا یا وی باژاری ھاتیە ڤەگوھەستن و ل ژێر چاڤدێریا پزیشکان دەیە.
