پارتیا وەلاتپارێزێن کوردستانێ دەربارێ سیاسەتا ترکیێ یا گوھەرتنا دەمۆگرافیا کوردستانێ و بجیھکرنا 218 مالباتێن ترک یێن ئاھسکایێ دە داخویانیەکی نڤیسکی بەلاڤ کر.
داخویانیا پوکێ وەھایە:
دەولەتا ترکیێ، ل خەلاتێ ب بجیھکرنا 218 مالباتێن ترک یێن ئاھسکایێ ڤە دخوازە چ بکە؟
دەولەتا ترکییێ، 218 مالباتێن ترکێن ئاھسکایێ کو ژ 703 کەسان پێک تێن، ل ناڤچەیا خەلاتێ یا باژارێ بیتلیس یا باکورێ کوردستانێ ب جیھ کرن.
دەولەتا ترکییێ، ژ ئاڤاکرنا کۆمارا ترکییێ ھەتا ئیرۆ، ژ بۆ دەمۆگرافییا کوردستانێ بگوھەرینە گەلەک جاران ھندەک مرۆڤێن ژ کافکاسیایێ، ئافگانیستانێ، بالکانان و ژ ھنەک باژارێن ھەرێما بەھرا رەشیا ترکییەیێ نە، ل ھنەک باژارێن باکورێ کوردستانێ ب جیھ کرییە. لێ دەولەتا ترکییەیێ د ڤێ سییاسەتا خوە دە زێدە ب سەر نەکەتییە و نکاربوویە ب ڤێ سییاسەتێ دەمۆگرافییا باکورێ کوردستانێ بگوھەرینە.
نھا ئەڤ گاڤا کو بجیھکرنا 218 مالباتێن ترک یێن ئاھسکایێ ل ناڤچەیا خەلات یا باژارێ بیتلیسێ ژی نیشان و بەردەوامییا وێ ھشمەندییا دەولەتا ترکیێ یە کو دخوازە دەمۆگرافییا خەلاتێ، دەمۆگرافییا باکورێ کوردستانێ بگوهرینە.
جیھێ پرسێ یە، ما گەلۆ چ باژارێن کو خەلکێ وێ ب ترکی دزانن نەما بوون کو دەولەتا ترکییێ ترکێن ئاھسکایێ ل باژارێن کوردان ب جیھ دکە؟
بەلێ، کوردستان وەلاتێ ملەتێ کورد و کوردستانییانە؛ مافێ دەولەتا ترکییێ تونەیە کو گەلێن دن ل باکورێ کوردستانێ ب جیھ بکە. دەولەتا ترکییێ دڤێت دەست ژ ڤێ سییاسەت و کریارێن خوەیێن کو دخوازە دەمۆگرافییا کوردستانێ بگوھەرینە بەردە.
23/2/2024
نڤێسینگەها راگەھاندنێ یا پارتییا وەلاتپارێزێن کوردستانێ (PWK)
