ب سه‌ده‌ما په‌كه‌كێ، تركیێ جاره‌كه دن گه‌ف ل یه‌نه‌كێ كرن
چاپەمەنیا سەر ب حكوومه‌تا ترکیێ رادگەهین کو یه‌نه‌كێ، ل ناڤ باژارێ سلێمانیێ و گوندێن دەردۆرێ، بنکە ژ بۆ هێزێن په‌كه‌كێ ڤەکرنە، ژ ئالیەکە دن ڤە ژی پەروەردە و راهێنانێن لەشکەری ددە ئەندامێن وێ پارتیێ، کو ژ رۆژئاڤایێ کوردستانێ ڤە دچن بۆ سلێمانیێ.
مالپەرا ئاژانسا ئانادۆلو یا ترکیێ راگەهاند، په‌كه‌كه ب رێیا ناڤێن جودا ڤە ل ناڤچەیێنە و مژوولێ کارێ ڤەگوهەستنا مادەیێن هشبەرن ل ناڤ ئیراق و ئیرانێ.
ل سلێمانیێ چەند پرتی و رێخستنێن سیاسی هەنە د بن ناڤێن جودا دە کار ژ بۆ په‌كه‌كێ دکن و ئەو ژی وەک تەڤگەرا ئازادی، پژاک، ئۆفیسا لێکۆلینا ژنێن کورد و ناڤەندا ئاکادەمینە.
هەروه‌ها ب زمانێ چەند چاڤکانیەکی ژی رادگەهینە، یه‌نه‌كێ ناسنامە ژ بۆ ئەندامێن په‌كه‌كێ دەرخستیە، ژ بۆ رێ ژ بۆ وان ڤەکە کو ب ئازادی ل ناڤچەیێ بمینن و کار بکن. ئەو هەڤکاری ژی وەک پرەکی ستراتەژیکا پەیوەندیێن ناڤبەرا قەندیل هەتا سووریێ بکارتینن.
هەرواها رادگەهینە: ل سلێمانی پەروەردە و راهێنان ب وان ئەندامێن په‌كه‌كێ رە تێ دایین کو ژ سووری ڤە تێن. ژ ئالیەکی دن ڤە یه‌نه‌كێ رێ دایە ملیسێن سەر ب ئیرانێ کو سلێمانیێ وەک خەتا دەرباسبوونا ژ بۆ خوە گەهاندنا سووریێ بکاربینن.
ل گۆر هەمان مالپەرێ، کەتنا هەلیکۆپتەرا ئالیکاریێ یا ناڤبەرا وان هەردو پارتیان، ب تەمامی ئاشکەرا کر، دەما 15ێ ئادارا 2023یێ ل سینۆرێ پارێزگەها دهۆکێ کەتخوارێ و 9 ئەندامێن په‌كه‌كێ تێدە ژیانا خوە ژ دەست دان. هەروه‌ها شاندنا بەرپرسێ دژەتەرۆرا یه‌نه‌كێ وەهاب هەلەبجەیی یا رۆژا 22/04/2023یێ بۆ سووریێ ژ ئالیێ بافل تالەبانی ڤە و بەشداریا سەرخوەشیا وان کەسێن د هەلیکۆپتەرێ دە ژیانا خوە ژ دەست دانە، ئاستا وان پەیوەندیێن د ناڤبەرا یه‌نه‌كێ و په‌كه‌كێ دە ژی ب تەمامی ئاشکەرا کر.
ئاژانسا ئانادۆلو دبێژە، سەردانێن فەرماندارێ هه‌سه‌دێ مەزلووم عەبدی ژ بۆ سلێمانیێ و جڤین و وێنە گرتنا وان ل گەل سەرۆکێ یه‌نه‌كێ بافل تالەبانی، وێ پەیامێ ددە کو پەیوەندیێن بهێز د ناڤبەرا وان هەردو پارتیان دە هەیە.
هەمان چاڤکانی بانگەشەیا وێ یەکێ دکە کو ئەڤ راپۆرتە ل سلێمانیێ ئامادە کریە، ئاماژە ب وێ یەکێ ژی دکە کو بافل تالەبانی رۆژا 23/11/2022یێ ل گەل جەمیل بایک کو یەک ژ رێڤەبەرێن سەرەکی یێ په‌كه‌كێ یە و مەزلووم عەبدی ژ بۆ جڤینەکی پارتیێن سیاسی ڤەخواندیە دوکانێ و ئەو جڤینە وەک نموونەیەکه دن یا هەڤکاری و هەماهەنگیا د ناڤبەرا یه‌نه‌كێ و په‌كه‌كێ ژی پشتراست دکە.
ل گۆر ئاژانسا ئانادۆلو، یه‌نه‌كه د بن ناڤێ شەرێ دژی داعشێ دە ئەو پەیوەندیێن ل گەل وان رێخستنێن دژی داعشێ دە هەیە، د هەمان دەمێ دە په‌كه‌كه ب ڤێ رێیێ ڤە چەک و تەقەمەنی و پێدڤیێن دن ب رێیا بالەفرگەها سلێمانیێ ڤە دگەهینە رۆژئاڤایێ کوردستانێ.
په‌كه‌كه د ناڤ سلێمانیێ دە چالاکیان دکە
دەربارێ چالاکیێن په‌كه‌كێیێن ناڤ سلێمانی و دەردۆرێ دە ژی مالپەرا فەرمی یا ترکیێ دبێژە، گەلەک کریارێن تەرۆریستی یێن په‌كه‌كێ ل ناڤ وی باژاری دە تێ کرن، ناڤ وان دە شەوتاندنا بنکەیێ پارتیێن سیاسی ژی د ناڤ دە. د خوەپێشاندانێن سالا 2020ێ دە رێخستنێن سەر ب په‌كه‌كێ بنکەیێ یه‌نه‌كێ و تەڤگەرا گۆڕان و پدک و بنکە و سازیێن گشتی ل ناڤەندا سلێمانی، هەلەبجە، رانیا و قەلادزێ شەوتاندن. رۆژنامەیێن ناڤخوەیێن هەرێما کوردستانێ وێ دەمێ ئاماژە ب وێ یەکێ ژی کرن کو په‌كه‌كێ نەخشە دانیە، ژ بۆ دەست ل سەر گەلەک خال و ناڤچەیان دە بگرە.
ئاژانسا ئانادۆلو ئاماژە ب وێ یەکێ ژی کر کو 16/08/2023یێ په‌كه‌كێ ب رێیا یەکینە و رێخستنا گەنجێن شۆرەشگەر ڤە دەست دایە کارێن تەرۆریستی و گەلەک زەڤی و باخێن ل رانیا و سلێمانیێ شەوتاندنە.
په‌كه‌كێ ئابۆریا سلێمانیێ ژناڤبرنە
ل گۆر راپۆرتا مالپەرا ئانادۆلو، په‌كه‌كێ دەست دانیە سەر سینۆرێ بەرفرەهێ سلێمانیێ، ترکیە ژی گەشتێن بالەفرگەها سلێمانیێ بۆ ترکیێ راگرتنە، ئەڤ یەک باندۆرەکی خراب ل سەر ئابۆریا سلێمانیێ کریە، ب وی ئاوایی ڤێ بالەفرگەهێ رەوشا ناڤنەتەویبوونێ ژ بەر راگرتنا گەشتێن ئەسمانێ ترکیێ ژ دەست دایە.
ب باوەریا چاڤدێران، ئەڤ راپۆرتا مالپەرا فەرمی یا ترکیێ، گەفخوارنەکی نوو یا ترکیێ یە ل یه‌نه‌كێ و ب تایبەت ژی کو ڤێ داویێ بەرپرسێن پایەبلندێن وی وەلاتی گەفێن جیدی ل یه‌نه‌كێ دخون.
