سەرۆکێ حکوومەتا ھەرێما کوردستانێ رادگەھینە کو لگەل سەرۆکێ لژنەیا ھێزێن چەکدار یێ جڤاتا پیرانا ئامەریکایێ جڤیایە.
سەرۆکێ حکوومەتا ھەرێما کوردستانێ مەسروور بارزانی ئیرۆ چارشەمبێ 28/2/2024 ل سەر تۆرا جڤاکی یا X راگەھاندیە، “د چارچۆڤەیا سەردانا خوە یا ژ بۆ واشنتۆنێ دە، ئەم لگەل سەناتۆر جاک رید و رۆجەر ویک جڤیان. ئەم د وێ جڤینێ دە ل سەر پاراستنا سەقامگریا ھەرێما کوردستانێ و بەردەوامیا پشتەڤانیا پێشمەرگەیان ژ ئالیێ ئامەریکایێ و ھەڤپەیمانان ڤە ھەڤنەرین بوون.”
سەرۆکێ حکوومەتا ھەرێما کوردستانێ ھەروەسا نڤیسیە، “پشتی جڤینا لگەل سەرۆکێ لژنەیا ھێزێن چەکدارا جڤاتا پیرانا ئامەریکایێ سەناتۆر جاک رید و ھەژمارەکا دن یا سەناتۆران، تەکەزی ل سەر پاراستنا سەقامگیریا ھەرێما کوردستانێ و ھەروەسا بەردەوامیدانا ب هاریکاریێن ئامەریکایێ ژ بۆ ھێزێن پێشمەرگەیان ھات کرن”.
مەسروور بارزانی ھەروەسا ئاماژە دایە، “د جڤینا ل گەل سەرۆکێ لژنەیا ھێزێن چەکدارا کۆنگرێسێ دە، تەکەزی ل سەر رێزگرتنا ل قەوارەیا فەدەرالی و دەستووری یا ھەرێما کوردستانێ ھات کرن”.
رۆژا شەمبیێ، 24/2/2024، سەرۆکێ حکوومەتا ھەرێما کوردستانێ مەسروور بارزانی ب ڤەخواندنەکا فەرمی گەھشت واشنتۆنا پایتەختا ئامەریکایێ، و ھەژمارەکە جڤینان لگەل بەرپرسێن بلندێن وی وەلاتی ل کۆچکا سپی، وەزارەتا دەرڤە و کۆنگرێسێ دکە، کو تەوەرێ سەرەکی یێ وان جڤینان گرێدایی زێدەتر پێشخستنا پەیوەندیێن ھەرێما کوردستانێ و ئامەریکایێ و داوی گوھەرتن و پێشڤەچوونێن رەوشا گشتی یا ئیراق و دەڤەرێ دبە.
