ئه‌مه‌ریكا هەرێما کوردستانێ وەکی هەڤپەیمانەکا خوە یا باوەرپێکری دبینە، لەوما ژی پارەکا هێزێن خوە ل هەرێما کوردستانێ بنەجهـ کریە.
ئه‌مه‌ریكایێ ژ بۆ پاراستنا بەرژەوەندیێن خوە و ل سەر داخوازا وەلاتێن رۆژهلاتا ناڤین بەردەوام بنگەهێن سەربازی ل چەند وەلاتێن دەڤەرێ ڤەکرنە و هێزێن خوە لێ بنەجهـ کرنە.
ب رەنگەکێ بەرفرەهـ بنەجهبوونا هێزێن ئه‌مه‌ریكایێ ل رۆژهلاتا ناڤین ژ بۆ شەرێ کەنداڤییێ تەباخا 1990ێ ڤەدگەرە. هنگێ ئه‌مه‌ریكایێ نێزی 700 هەزار سەربازێن خوە ل کەنداڤی بنەجهـ کرن و تەڤلی وی شەری بوو. نێزی 300 سەربازێن ئه‌مه‌ریكایێ ژی د وی شەری دە هاتن کوشتن.
سال ل دوو سال گوهەرتن ب سەر هەژمارا سەربازێن ئه‌مه‌ریكایێ ل رۆژهلاتا ناڤین دە هاتیە. نها هێزێن ئه‌مه‌ریكایێ ل رۆژهلاتا ناڤین ژ 51 هەزار و 902 سەرباز و شێورمەندان پێک تێن.
سەربازێن ئه‌مه‌ریكایێ ب ڤی ئاوایی ل سەر وەلاتێن دەڤەرێ هاتنە بەلاڤکرن: 2500 ل ئیراقێ نە کو هەژمارەکا وان ل هەرێما کوردستانێ یە، 1700 ل ترکیەیێ نە، 900 ل سووریەیێ، 300 ل ئوردنێ، 10 هەزار ل کوێتێ، 2000 ل ئەرەبستانا سعوودیێ، 4700 ل بەحرەینێ، 10 هەزار ل قەتەرێ، 5 هەزار ل ئیماراتێ، 500 ل کەنداڤی، یەک هەزار ل دەریایا عەرەبی و 6 هەزار ژی ل دەریایا ناڤەراست.
بنەجهکرنا هێزێن ئه‌مه‌ریكایێ ل رۆژهلاتا ناڤین ژ بۆ چەند مەرەمانە، وەکی ئالیکاریکرنا ئارتێشێن وەلاتان، رووبرووبوونا تەرۆرێ، پاراستنا بەرژەوەندیێن ئه‌مه‌ریكایێ ل دەڤەرێ، پشتەڤانیکرن و پاراستنا هێزێن ئه‌مه‌ریكایێ و رێگرتنا ل بەرفرەهبوونا شەری و تایبەت شەرێ ناڤبەرا ئسرائیل و حەماسێ.
ئه‌مه‌ریكا وەبەرهێنانێ د پاشەرۆژا پەیوەندیێن خوە دە ل رۆژهلاتا ناڤین دکە، لەوما ژی چێکرنا مەزنترین کۆنسولخانە ل هەرێما کوردستانێ نیشانا کارێن بهەڤرە و باوەریا ئه‌مه‌ریكایێ ب ڤێ هەرێمێ یە ل پاشەرۆژێ.
چاڤدێر دبێژن کو، هەبوونا مەزنترین کۆنسولخانەیا ئه‌مه‌ریكایێ ل هەرێما کوردستانێ ئاماژەیە ژ بۆ گرنگیدانا ئه‌مه‌ریكایێ ب وێ دەڤەرێ و مانا وێیە ژ بۆ دەمەکێ دوور و درێژ ل هەرێما کوردستانێ، تایبەت هەرێما کوردستانێ د دەما بۆری دە سەلماندیە کو هەڤپارەکا جهێ باوەریا ئه‌مه‌ریكایێ یە ل ئیراق و رۆژهلاتا ناڤین.
چاڤكانی: كوردستان 24
