پشتی کو ھێزێن پاسەوانێن سینۆرێ ئیراقێ د 20 شباتێ دە ل خەتا شێلادزێ و ئامێدیێ ب جھ بوون، پەکەکێ و مەدیایا وێ بوویەر بەرۆڤاژی کرن و راگھاندن کو ھێزێن دچن ھەرێمێ ھێزێن زێرەڤانی نە و ئارمانجا وان ئەوە کو رێ ل بەر ھێزێن چەکدارێن ترکیێ ڤەکن. کەجەکێ ژ بۆ سەختەکرنا تەماشەڤانان سەری ل گەلەک چاڤکانیێن نەدیار دا. لێ بەلێ ب داخویانیا هەپەگێ دەرەوێن د داخویانیا کەجەکێ دە ب زەلالی ئەشکەرە بوون.
ھەپەگێ د 26 شباتێ دە داخویانیەک دا و دەستنیشان کر کو ھێزێن ھاتینە ھەرێمێ یێن ئارتێشا ئیراقێ نە و ژ ھێزێن ئیراقی خوەست کو ب ھەستیاری تەڤبگەرن و گۆت، ئەم نە ل دژی وێ نە کو دەولەتا ئیراقێ سینۆری بگرە.
د داخویانیا ھەپەگێ یا 26 شباتێ دە ئەڤ تشت ھاتنە گۆتن: “رۆژێن داوی ھێزێن ئیراقێ ب ناڤێ پاسەوانێن سینۆری’ ھاتینە ھن قادێن ھەرێمێن زاپ و ئاڤاشینێ یێن ل ھەرێمێن پاراستنێ یێن مەدیایێ کو شەر لێ گرانە. جھێن کو ھێزێن ئیراقێ ھەول ددن بێن؛ ب کیلۆمەترەیان دووری سینۆرێ فەرمی یێ دەولەتێن ئیراق و ترکیەیێ یە، ل ناڤا باشوورێ کوردستانێ یە کو نھا د ناڤبەرا گەریلا و ئارتێشا ترک یا داگیرکەر دە شەرەکی گران لێ دقەومە. ئەم نە ل دژن کو ھێزێن سینۆرێن ئیراقێ پاراستنا سینۆری بکن، لێ بەلێ جھێن کو ھاتنێ نە خەتا سینۆرە. ئەڤ ھێز ل ھەرێمێن ناڤبەرێ تێنە بجھکرن کو شەرەکی گران لێ دقەومە. لەوما ژ ڤێ لڤ و تەڤگەرێ تێ فێھمکرن کو ھن ھێز ل پەی ھن لیستکانە. وێ هێژ پێتر کێرھاتی بە کو ھێزێن ئیراقێ ڤێ راستیێ بزانن و ھایا وان ژ شەرێ ل ڤێ قادێ ھەبە و ل گۆری ڤێ یەکێ تەڤبگەرە.”
ھەپەگێ ب ڤێ داخویانیێ ھەموو داخویانی و نووچەیێن چاپەمەنیا پەکەکێ د سەری دە داخویانیا کۆمیتەیا تێکلیێن دەرڤەیا پەکەکێ یا تێکلداری ھێزێن ل خەتا شێلادزێ و ئامێدیێ ب جھ بوونە ب دەرەو نیشان دا.
د داخویانیا ھەپەگێ دە خالەکا دن یا بالکێش هەبوو کو ئەو ژی ئەڤ بوو کو راگهاندی، “ئەم نە ل دژی بجھکرنا ھێزێن ئیراقێ نە ل ڤان دەڤەران.” ئەڤ د دەمەکی دە یە کو ژ سالا 2018 ڤە ئارتێشا ترکیێ ڤان هەرێمان ب هنجەتا هەبوونا گەریلایێن پەکەکێ داگیر دکە و پەکەکە ژی دژبەریا ھێزێن پێشمەرگەیێن کوردستانێ دکە کو بچن وان هەرێمان، پەکەکێ ھەموو چیایێن گرینگ و ستراتەژیکێن خاکا کوردستانێ کو ژ 50 کم زێدەترە دانە دەست ئارتێشا ترکیێ و هاتنا پێشمەرگەیان بۆ وێ دەڤەرێ وەک ھنجەتەک ژ بۆ شەر دبینە. ھەپەگێ ب داخویانیا ئیرۆ راگھاند کو ئەو نە ل دژی ھێزێن ئراقێ یە. ل گۆری داخویانیا ھەپەگێ، ژ بلی ھێزێن پێشمەرگە ھەموو ھێز دکارن بکەڤن ھەرێمێ و ب جھ ببن.
د داخویانیا ھەپەگێ دە خالەکا دن یا گرینگ ژی هەبوو، ھەپەگێ راگهاند، “جھێن کو ھێزێن ئیراقێ ھەول ددن بێن؛ ب کیلۆمەترەیان دووری سینۆرێ فەرمی یێ دەولەتێن ئیراق و ترکیەیێ یە و نە ناڤچەیێن سینۆری نە.” ژ بەر کو ھەموو خەتێن سینۆر و 50 کم قادا ھوندر د بن کۆنترۆلا ترکیەیێ دە نە و ھەموو دەڤەر ژ پەکەکێ هاتنە ستەندن. ئەڤ نیشان ددە کو شەر چقاسی پێش کەتیە و ل هەر دەرێ پەکەکە راستی شکەستنێ هاتیە، ب تەمامی بەرەڤاژی وێ یەکێ یە یا کو پەکەکە د چاپەمەنیا خوە دە باس دکە و هەر تم دبێژە “مە لەشکەرێ ترکیێ راوەستاندیە و دەربەیێن مەزن لێخستنە”.
د ڤان سالێن داوی دە پەکەکە کو خوە ل گۆری ئاژاندایێن ئیرانێ ل ھەرێمێ ب جھ کریە، ل دژی ھەرێما کوردستانێ دەست ب شەرێ ئایدۆلۆژیک، سیاسی و لەشکەری کریە. ب تایبەتی د مەدیایا خوە دە ھەر تم ھەول ددە دژمناتیا خوە یا ل دژی کوردستانێ ل سەر تەماشەڤانێن خوە فەرز بکە.
