ئەندامێن رێخستنا جوانێن شۆرەشگەر یا گرێدایی پارتیا کارکەرێن کوردستانێ “پەکەکێ” زارۆکەک تەمەن بچووک ژ باژارێ منبجا باکورێ سووریێ رەڤاندن.
تۆرا سووری یا مافێن مرۆڤی د داخویانیەکێ دە راگھاند کو ئەندامێن رێخستنا “جوانێن شۆرەشگەر” زارۆکێ ب ناڤێ جاسم حسێن یێ 17 سالی ژ گوندێ دۆشان یێ باژارێ منبجێ یێ گوندەوارێن رۆژھلاتێ پارێزگەھا حەلەبێ، ب مەبەستا چەکدارکرنا وی رەڤاندیە. جاسم حسێن دەما کو د 11 شباتا 2024 دە ژ خالەکا کۆنترۆلێ یا گوندێ تل ئەل-یاسیتی ل ئالیێ رۆژھلاتێ باژارێ منبجێ دەرباس دبوو هاتیە رەڤاندن و “جوانێن شۆرەشگەر” ئەو بریە یەک ژ ناڤەندێن خوە یێن لەشکەرکرنا ب زۆرێ.
هەروەها ئاماژە ب وێ یەکێ ژی کر کو چ کەس ژ ئەندامێن مالباتا وی ژ ڤێ یەکێ ئاگاھدار نەبوونە، و ئەو ژ دانووستاندنا لگەل مالباتا خوە هاتیە بێپار کرن و نەهشتنە مالباتا وی سەرەدانا وی بکن.
فەرماندارێ ھێزێن سووریا دەمۆکراتیک مەزلووم کۆبانێ د سالا 2019 دە لگەل ڤێرجینیا گامبا نوونەرا نەتەوێن یەکگرتی بۆ کارووبارێن زارۆکان، ل سەر پەیمانەکێ ئیمزە کربوو، کو ئێدی زارۆکان تەڤلی ھێزێن خوە نەکە و زارۆکێن د ناڤ دە سەربەست بەردە، لێ تا نھا چ پابەندی ب وێ پەیمانێ نەھاتیە کرن، ھەر دەم چەکدارێن ب ناڤ و رەنگێن جودا د ناڤا هەسەدێ دە زارۆکان درەڤینن و تەڤلی لەشکەریا نەچاری دکن.
ل گۆری چاڤدێران، ئارمانجا رێخستنا “جوانێن شۆرەشگەر” و رێخستنێن سەر ب پارتیا کارکەرێن کوردستانێ ڤە، ژ رەڤاندنا بچووکان، شووشتنا مەژیێ زارۆکان ل گۆر بیردۆزێن پارتیا کارکەرێن کوردستانێ و خستنا وان د ناڤ رەفێن پارتیێ دەیە ب ئاوایەکی لەشکەری.
