نەھ سازی و کۆمیتەیێن مافێن مرۆڤان ل سووریێ ئێریشا ل دژی مەراسیما کۆچا داوی یا مەلا مستەفا بارزانی ل باژارێن کۆبانێ و دربێسیێ یێن رۆژئاڤایێ کوردستانێ شەرمەزار کرن.
کۆمیتەیا کوردی یا ژ بۆ مافێن مرۆڤان ل سووریێ (RASID)، رێخستنا مافێن مرۆڤان ل سووریێ (ماف)، رێخستنا بەرەڤانیا ل گرتیان ل سووریێ (رەوانگەھ)، رێخستنا کوردی ژ بۆ مافێن مرۆڤان ل سووریێ (داد)، یەکیتیا گشتی یا نڤیسکار و رۆژنامەڤانێن کورد ل سووریێ (نڤێسینگەها یاسایی)، رێخستنا ژنێن کورد یا ئازاد، ھێزێن جڤاکا سڤیل یا کوردستانێ، ئەنجوومەنا ئێزدیێن سووریێ و کۆمیتەیا یاسایی یا ھەڤدیتنا نشتمانی یا دەمۆکراتیک ل سووریێ ب داخویانیەکا ھەڤبەش ئێریشا ل سەر سالڤەگەرا کۆچا داوی یا مەلا مستەفا بارزانی ل کۆبانێ و دێربێسیێ شەرمەزار کرن.
د داخویانیێ دە ھات گۆتن: “ب دەھان کەسێن رووگرتی یێن رێخستنا جوانێن شۆرەشگەر ئێریشی ئۆفیسا پارتیا دەمۆکراتا کوردستان – سووریێ ل باژارێ کۆبانی کرن، کو بریار بوو کۆچا داوی یا مەلا مستەفا بارزانی ژ ئالیێ ئەنجوومەنا نشتمانی یا کورد ل سووریێ (ئەنەکەسێ) ڤە لێ بھاتا ببیرانی.”
د داخویانیێ دە ھات گۆتن، ئێریشکەران ئێریشی ئۆفیسێ کرن و تشتێن تێ دە شکاندن و شەوتاندن و سلۆگانێن ئیخانەتێ ل دژی ئەندامێن پارتیێن ئەنەکەسێ و مێڤانان ئاڤێتن و ل وان دان کو د ناڤا وان ژن، زارۆک و کەسێن ب تەمەن ھەبوون و ھن ژ وان بریندار بوون.
داخویانیا 9 سازی و رێخستنێن مافێن مرۆڤان ئاماژە ب وێ ژی کر، د ھەمان دەمێ دە ژی، ل دربێسیێ ژی گرۆپەکێ رووگرتی ئێریشی ئاھەنگا ئەنەکەسێ کر و ئاموورێن دەنگ و ژەنەراتۆرا ئاھەنگێ تێک دان و سلۆگانێن ئیخانەتێ ئاڤێتن.
ھەروھ گۆتن: “ژ بەر ڤێ یەکێ، ئەم رێخستنێن مافێن مرۆڤان و سڤیلێن کو ل ژێر ئیمزە کرنە، ژ کریارێن رێخستنا جوانێن شۆرەشگەرێن ل دژی چالاکڤان و سڤیلان دلگرانین و ئێریشا ل کۆبانێ شەرمەزار دکن.
د بەشەکا دن یا داخویانیێ دە ھات گۆتن ژی: “ئەم ئێریشا ل سەر وان کەسێن کو ب بۆنەیا بیرئانینا 45 سالڤەگەرا کۆچا داوییا رێبەرێ دیرۆکی یێ گەلێ کورد مەلا مستەفا بارزانی، کو د ناڤا گەلێ کورد ل سووریێ دە وەکە سەمبۆلەکا مەزن یا نەتەوییە و خوەدی پێگەھەکێ مەزنە، شەرمەزار و روورەش دکن.”
د داخویانیێ دە ھات گۆتن، “ئەڤ کریارا جوانێن شۆرەشگەر، بنپێکرنا ئەشکەرە یا یاسایێن ناڤدەولەتی یێن گرێدایی مافێن مرۆڤان و ئازادیا رامان و دەربرینێ و بنپێکرنا ئەشکەرەیا ھەموو یاسایێن ناڤدەولەتی و یاسایێن ئەسمانی و ئەخلاقییە. دڤێت ئەو بێنە دادگەھکرن کو رێخستنێن مافێن مرۆڤان و پارێزەرێن سەربخوەیێن مالباتێن زەرەرمەندان ژی تێ دە بەشدار بن.”
د داویێ دە ھات گۆتن: “ئەم بانگ ل سازیێن مافێن مرۆڤان یێن ھەرێمی و ناڤدەولەتی دکن کو ژ بۆ شەرمەزارکرنا ڤێ تاوانێ کو یەک ژ رێزە بنپێکرنێن ڤێ رێخستنێیە، چالاکیان لدار بخن و پارتیا یەکیتیا دەمۆکراتیک (پەیەدێ) ژ ڤێ یەکێ بەرپرسیار ببینن.”
