سەکرەتەرێ پارتیا دەمۆکراتا کوردستانێ–سووریێ (پەدەکە-سێ) ل سەر ئێریشا “جوانێن شۆرەشگەر” ل سەر ئۆفیسا پەدەکە-سێ ل کۆبانێ دە گۆت: “ئەو شانازیێ ب دژایەتیا پرۆژەیا نەتەوەیی دکن.”
سەکرەتەرێ پەدەکە-سێ محەمەد ئیسماعیل گۆت: “ئارمانج ژ ئێریشا گرۆپێن سەر ب پەیەدێ ڤە ل سەر بارەگەھێن ئەنەکەسێ ئەوە کو مەترس، توندووتووژی و ئالۆزیان بخن ناڤا جڤاکا کوردی، تا کو تەڤگەرا سیاسی یا کوردی بەحسا دۆز و مافێن خوە نەکە. ھەتا پارتیێن ل کێلەک پەیەدێ ژی ئێدی نەما بەحسا دۆز و مافێن نەتەوەیی دکن. تەنێ ئەنەکەسە و پارتیێن د ناڤا وێ دە و ئالگرێن وێ بەحسا ڤێ دۆزا نەتەوەیی دکن، ئارمانجا ئێریشێن ل سەر ئەنەکەسێ د رۆژەکا پیرۆزیا وەک ببیرئانینا مەلا مستەفا بارزانی ژی، تەپەسەرکرن و چەوساندنا خەباتا کوردییە.”
محەمەد ئیسماعیل تەکەزی ل سەر وێ یەکێ کر: “ھزرا نەتەوەیی ل جەم ملەتێ مە خورت و بھێزە و ئەڤ کریارێن ل دژی مە تێن کرن، ناھێلن کو ئەم ژ دۆز و خەباتا خوە بدوور بکەڤن و ئەم دێ ل سەر رێیا خەباتا خوە بەردەوام بن.”
سەکرەتەرێ پەدەکە-سێ ئاماژە ب وێ ژی کر، ئەڤ ئێریشێن ل سەر ئالا، سەمبۆل و نرخ و بھایێن نەتەوەیی، ژ ھەموو پارتی و چینێن جڤاکی و ئالیێن ناڤدەولەتی ڤە جھێ شەرمەزاری و روورەشیێ نە.
ھەروھا دا زانین، ل رۆژئاڤایێ کوردستانێ ئۆفیس و بارەگەھێن پەدەکە-سێ و پارتیێن د ناڤا ئەنەکەسێ دە ھەر تم راستی ئێریشان تێ و کارێن وان ژی تێن ئاستەنگکرن، لێ ل ھەمبەرێ ژی ئۆفیسێن پارتیێن بەعس و نژادپەرەرست و سیخورێن رێژیما سووریێ ب ئاسایی کارێن خوە دکن.
محەمەد ئیسماعیل دەستنیشان کر ژی، “ئەڤ ئێریشا ل سەر ئۆفیسا پەدەکە-سێ ل کۆبانێ ژ ئالیێ پارتی و ھێزێن سەر ب رێڤەبەریا خوەسەر ڤەنە نەھات شەرمەزار کرن و نکارن شەرمەزار ژی بکن. ھەروھا ھێزێن ئاسایشێ رێگریێ ل کریارێن جوانێن شۆرەشگەر ناکە، بەلکو وان دپارێزە. جوانێن شۆرەشگەر د سەر قانوون و یاسایان رەیە و ئەو شانازیێ ب دژایەتیا پرۆژەیا نەتەوەیی دکن.”
سەکرەتەرێ پەدەکە-سێ تەکەزی ل سەر یەکرێزیا کوردی ل رۆژئاڤایێ کوردستانێ کر و گۆت: “یەکرێزی گەلەک باشە و داخوازا مەیە، ب کێمانی ڤە دڤێت ئەم یەکھەلوەست بن، لێ ئەو ب ڤان کریاران دخوازن یەکھەلوەستی ژی تونە بە. ھەموو کار و خەباتا وان ئەوە کو کورد نێزیکی ھەڤدو نەبن. ب ڤێ یەکێ ژی خزمەتا ئەجندایێن دژمنان دکن.”
