کۆلبەرەک ب گولـلەیێن راستەراست یێن ھێزێن ئەولەھیا ئیرانێ ھات شەھیدکرن

 کۆلبەرەکی خەلکێ باژارێ تیکاب یێ رۆژھلاتێ کوردستانێ د دەما کۆلبەریێ دە ب گولـلەیێن راستەراست یێن ھێزێن ئەولەھیا ئیرانێ ھات شەھیدکرن.

ل گۆر زانیاریان، ئیرۆ 3/3/2024 دەمژمێر 2:00 سەرێ سبەھێ ھێزێن ئەولەھیا ئیرانێ ل سینۆرێ ھەنگەژالی یا بانە گولـلە بەردان کۆلبەران و ژ بەر وێ ژی کۆلبەرەکی ب ناڤێ عەلی زەرخامی یێ تەمەن 52 سالی ھات شەھیدکرن.

ھات زانین ئەو کۆلبەر بوویە ئارمانجا گولـلە بەردانا راستەراست یا ھێزێن ئەولەھیا ئیرانێ و پشترە گولـلە ل زکێ وێ کەتیە و د جیھ دە ژیانا خوە ژ دەست دایە.

عەلی زەرخامی خەلکێ گوندێ ساریباخا سەر ب باژارێ تیکابە و روونشتڤانێ باژارێ سەقزێ بوویە، ھەروھا بابێ 3 زارۆکان بوویە.

ل گۆر ئامارێن تۆمارکری، د ھەیاما مەھا شباتا 2024 دە 4 کۆلبەر و کاسبکار ل سینۆرێ رۆژھلاتێ کوردستانێ ھاتنە شەھیدکرن و 63 کۆلبەر ژی بریندار بوونە.