چەتەیێن ب ناڤێ “جوانێن شۆرەشگێر” یێن راستەراست فەرمانا ژ قەندیلێ وەردگرن ل سەر رەڤاندنا زارۆکێن بچووک بەردەوامە، ھەری داوی زارۆکەک 14 سالی ژ تاخا شێخ مەقسوود ل حەلەبێ رەڤاند.
ل گۆر ئاگاهیان، ل تاخا شێخ مەقسوود یا ل حەلەبێ چەتەیێن پەکەکێ زارۆکێ ب ناڤێ سلێمان عەلی عەلی یێ تەمەن 14 سالی رەڤاند و بەرەڤ جھەکی نە دیار ڤە برن، کو تا نھا چارەنڤیسا وی نە دیارە.
زارۆکێ رەڤاندی سلێمان عەلی عەلی خەلکێ گوندێ قەنتەرا یێ سەر ب ناڤچەیا ماباتا ل عەفرینا رۆژئاڤایێ کوردستانێ یە.
تێ زانین، فەرماندارێ ھێزێن سووریا دەمۆکراتیک مەزلووم کۆبانێ د سالا 2019 دە لگەل ڤێرجینیا گامبا نوونەرا نەتەوێن یەکگرتی بۆ کارووبارێن زارۆکان، ل سەر پەیمانەکێ ئیمزە کربوو، کو ئێدی زارۆکان تەڤلی ھێزێن خوە نەکە و زارۆکێن د ناڤ دە سەربەست بەردە، لێ تا نھا چ پابەندی ب وێ پەیمانێ نەھاتیە کرن، ھەر دەم چەکدارێن ب ناڤ و رەنگێن جودا د ناڤا هەسەدێ دە زارۆکان درەڤینن و تەڤلی لەشکەریا نەچاری دکن.
