33 سال ب سەر سەرهلدانا مەزن یا گەلێ کوردستانێ رە دەرباز دبن، کو ل 5ێ ئادارا 1991ێ چریسکا یەکێ یا وەرچەرخانەکە دیرۆکی ل باژارێ دەرازینکا سەرهلدانێ گەش بوو و گەلێ کورد ل دژی زلم و ستەما رژێما بەعس سەرێ خوە هلدا.
مەها ئادارێ ژ بۆ کوردان پری روودانێن جودا جودایە لێ ژ رۆژا 5ێ ئادارێ هەتا 21ێ ئادارێ ژ بۆ خوەجهێن باشوورێ کوردستانێ تایبەتمەندیا خوە هەیە، د دەما ڤان چەند رۆژان دە ل سالا 1991ێ خەلکی ل دژی رژێما بەعس سەرێ خوە هلدا، کو ژ بۆ دەما گەلەک سالان دەستهلاتداریەکە توند و نەمرۆڤانە ل بەرانبەری گەلێ کورد بکار دئانی.
بەری سەرهلدانێ هەڤپەیمانیا ئالیێن باشوورێ کوردستانێ د بەرەیێ کوردستانی دە وەسا کر کو گەرماتیەک دا خەلکی و د دەمەکە کورت دە کارین گەلەک باژار و باژارکێن باشوورێ کوردستانێ ئازاد بکن.
ل 5ێ ئادارا 1991ێ، نەخشەیێ یەکێ یێ سەرهلدانێ هات دانان و د عەینی رۆژێ دە خەلکی ب پشتەڤانیا پێشمەرگەیێ کوردستانێ باژارێ رانیایێ و دەردۆرێن وێ رزگار کرن و تەڤایا دەزگەهـ و سەربازگەهێن رژێما بەعس گرتن و ئێدی جەماوەر و پێشمەرگەیان باژار و باژارک و دەڤەرێن دن یێن کوردستانێ ژی گرتن.
سەرۆک بارزانی ژی، کو ل سالا 1988ێ پێشبینیا گوهەرتنێن مەزن کربوو، ب سەرکردەیێن دن یێن بەرەیێ کوردستانی رە مل ب ملێ پێشمەرگەیێن جانفەدایێن کوردستانێ تەڤلی رزگارکرنا تەڤایا باژار و باژارک و دەڤەرێن کوردستانێ بوو، د داستانا شەرێ کۆرێ دە ژی سەرپەرشتیا شەری کر کو د ئەنجامێ دە رژێم نەچار بوو داخوازا دانوستاندنان ب بەرەیێ کوردستانی رە بکە.
سەرهلدان بەرێ هەڤاهەنگیا بەرەیێ کوردستانی بوو، د بزاڤا رزگاریخوازیا گەلێ کوردستانێ دە وەرچەرخانەکە دیرۆکی بوو، کو بەرێ وێ قەوارەیا هەرێما کوردستانێ بوو.
سەرهلدان بەرێ ئالیکاری و هەڤاهەنگیا پارتیێن ناڤ بەرەیێ کوردستانی و خەلکێ کوردستانێ بوو، ژ رانیایێ دەست پێ کر و ب کۆنترۆلکرنا کەرکووکێ ل رۆژا 21ێ ئادارێ کو نەورۆز بوو بداوی هات و تەڤایا باشوورێ کوردستانێ ژ بن دەستێ رژێما بەعس هات دەرخستن.
چاڤكانی: كوردستان24
