پێگەھا میدل ئێست ترانسپارنت کو گرێدایی لێکۆلینێن ستراتەژیکە دبێژە، “باشترە کو ئامەریکا تەڤایا ھێزێن خوە ژ ئیراقێ ڤەنەکێشە، بەلکی ھەژمارەکا ھێزێن خوە ببە ھەرێما کوردستانێ ژ بۆ پشتەڤانیکرنا ھێزێن پێشمەرگەیان و رووبرووبوونا تەرۆرێ”.
“پێدڤییە ئامەریکا خالا گرانیا ھێزێن خوە ببە ھەرێما کوردستانێ، بەرۆڤاژی وێ یەکێ مەترسی دێ ل سەر شاندیێن وێ ل دەڤەرێن دن یێن ئیراقێ چێ ببە”، ئەڤ پارچەکە ژ راپۆرتا پێگەھا میدل ئێست ترانسپارنت یا ناڤدەولەتییە ل سەر ئحتیمالا ڤەکێشانا ھێزێن ئامەریکایێ و گڤاشتنێن ئالیێن شیعە ل سەر وێ پرسێ.
پێگەھا میدل ئێست ترانسپارنت کو گرێدایی لێکۆلینێن ستراتەژیکە راپۆرتەکا شرۆڤەکاری ل سەر دوبەرەکی و دانوستاندنێن گرێدایی ھێلان یان ژی دەرخستنا ھێزێن ئامەریکایی ژ ئیراقێ بەلاڤ کریە و تێ دە ھاتیە، “د بەرژەوەندیا واشنتۆنێ دەیە کو گرانیا خوە ل بەغدایێ زێدە بکە لێ نە ژ ئالیێ سەربازی ڤە، بەلکی ب رێیا دپلۆماسی و ئابۆری، دکارە ھێزێن خوە ڤەگوھێزە ھەرێما کوردستانێ، ژ بەر کو ب دەرخستنا تەڤایا ھێزێن خوە ژ ئیراقێ، بالیۆزخانە و شاندیێن وێ یێن دپلۆماسی دێ رووبروویی مەترسیێ ببن.”
وێ پێگەھا ناڤدەولەتی رۆن ژی کریە، “داخوازا ڤەکێشانا ھێزێن ئامەریکایێ ژ ئیراقێ نە تشتەکی نوویە، بەلکی ژ سالا 2018 ڤە ھەیە و کوشتنا قاسم سلێمانی و ئەبو مەھدی موھەندس ل دەستپێکا 2020 ئەو داخوازی گەھاند کۆپیتکێ.”
میدل ئێست ترانسپارنت ھەروەسا ئاماژە دایە، “نە تەنێ ملیشیا، بەلکی هەژمارەکا ئەندامێن حکوومەتا سوودانی ژی ل پشت پەردەیان گڤاشتنان ژ بۆ دەرخستنا ھێزێن ئامەریکایی چێ دکن، لێ بێ ھەبوونا سەربازێن ئامەریکایی ل ئیراقێ، ھێزێن ئەولەھیێ یێن ئیراقێ نکارن شاندیێن وان یێن دپلۆماسی بپارێزن.”
وێ پێگەھا ناڤدەولەتی د دەربارێ سوودانی دە ژی گۆتیە، “دیار نینە سوودانی ب ڤەکێشانا ھێزێن ئامەریکایێ رەیە یان نە، لێ ھەژمارەکا راگەھاندنێن وی یێن ل دژی ئامەریکایێ ژ بۆ رازیکرنا ھێزێن شیعەیێن ناڤ حکوومەتا وی بوونە”.
میدل ئێست ترانسپارنت داخوازێ ژ ئامەریکایێ دکە کو بەشەک ژ ھێزێن خوە ل ھەرێما کوردستانێ بنەجھ بکە ژ بۆ رووبرووبوونا داعشێ و پشتەڤانیا ھێزێن پێشمەرگەیان، ژ بەر کو ھەرێما کوردستانێ ژ بۆ بنەجھبوونا ھێزێن ئامەریکایێ ژینگەھەکا گونجاییترە.
