هێزێن چەکدارێن ترکیێ پلان دکن کو ئۆپەراسیۆنەکا په‌یاده یا بەرفەرەهـ ل هه‌رێما كوردستانێ ل دژی چەکدارێن پارتیا کارکەرێن کوردستانێ (په‌كه‌كێ) پێک بینن.
رۆژنامەیا حوڕیەت کو نێزیکی پارتیا دەستهلاتداره ل تركیێ، د گۆتارا رۆژنامەڤان عەبدولقادر سیلڤی دا راگهاند: «بەری هەر تشتی دێ ئۆپەراسیۆنەکا په‌یاده یا بەرفەرەهـ ل دەڤەرا کو ئۆپەراسیۆنا (په‌نجه كلید) لێ دهێته کرن، هێته ئه‌نجام دان. بەریا ئۆپەراسیۆنێ تركیه ل گه‌ل حكومه‌تا ناڤەندی یا ئیراقێ لهەڤکرنەک کری یه.
ل گۆری رۆژنامەیێ، ئەنقەرە چاڤەرێ دکەت کو تەڤاهیا سینۆرێ خوە یێ ل گه‌ل ئیراقێ و هه‌رێما كوردستانێ کو درێژاهیا وی 378 کیلۆمەترە، ل پێشبەری پارتیا کارکەرێن کوردستانێ “بگریت”.
هێژایی گۆتنێ یە کو سەرۆکۆمارێ ترکیێ رەجەپ تاییپ ئەردۆگان پێشتر گۆتبوو کو وەلاتێ وی پلان دکەت کو د هاڤینا ئیسال دا “پرسگرێکا ئەولەکارییا سینۆر” ل گه‌ل ئیراقێ چارەسەر بکەت.
ئارتێشا ترکیێ رۆژا 17ێ نیسانا 2022ان د ناڤ ئاخا باشوورێ کوردستانێ دا ل دژی په‌كه‌كێ دەست ب ئۆپەراسیۆنا ب ناڤێ «پەنجە-کلید» کر و ئۆپەراسیۆن هەتا نها بەردەوامە. ئۆپەراسیۆنا «پەنجە-کلید» ناڤچەیێن مەتینا، زاپ و ئاڤاشین-باسیان یێن ل سینۆرێ ناڤچەیا ئامێدیێ ب خوه ڤه دگریت.
