سیاسەتمەدارەکی ھەرێما کوردستانێ ئاماژەیێ ددە، “بریارێن دادگەھا فەدەرالی مەترسیدارن و ئاماژە وێ یەکێ دگەھینن کو ئەو دادگەھ دخوازە پرۆسەیا دامۆکراسی ل ئیراقێ ب داوی بینە.”
سیاسەتمەدارێ ھەرێما کوردستانێ مەلا بەختیار ئیرۆ پێنجشەمبێ 7/3/2024 د کۆنفرانسەکا رۆژنامەڤانی دە راگەھاند، “دادگەھا فەدەرالی دخوازە دەولەتەکاناڤەندی و مەزھەبی چێ بکە”.
وی سیاسەتمەداری بەحس ژی کر، “ئەگەر مەرەما وێ دادگەھێ بجھانینا دەستووری با، دا بەری دەھ سالان بریارێ ل سەر مادەیا 140 دەت، لێ ئاماژە رۆنن کو داخوازا عەرەبیکرنا دەڤەرێن کوردستانی ژ ئالیێ بەغدایێ ڤە بەردەوامە”.
مەلا بەختیار ھەروەسا گۆت، “بریارێن دادگەھا فەدەرالی مەترسیدارن و ئاماژە وێ یەکێ دگەھینن کو ئەو دادگەھ دخوازە پرۆسەیا دامۆکراسی ل ئیراقێ ب داوی بینە.”
دادگەھا فەدەرالی د ھەیاما ڤان 7 سالان دە ھەژمارەکا بریاران ل دژی قەوارەیا ھەرێما کوردستانێ و پێکھاتێن دن یێن ئیراقێ دەرخستیە.
ل سالا 2005 کو ئیراق د قۆناغا ڤەگوھەرتنا دەستھلاداریێ دە بوو، دادگەھا فەدەرالی ب بریارەکا وەزاری بەری نڤیسینا دەستوورێ نوویێ ئیراقا فەدەرالی ھات دامەزراندن.
ل گۆر مادەیا 92 یا دەستووری، ئەو دادگەھ ھێشتا نەھاتیە ناڤ بازنێ دەستوورێ دەولەتا فەدەرالی، لێ ب بریارێن خوە یێن سەپاندنێ ل سەر دژاتیکرنا قەوارەیا فەدەرالی یا ھەرێما کوردستانێ و نەتەوە و پێکھاتێن دن یێن ئیراقا فەدەرالی بەردەوامە و ب ئەشکەرەیی دەستوورێ وەلاتی بنپێ دکە.
