ل حەسەکێ، دایکێن کو زارۆکێن وان ژ ئالیێ تەڤگەرا «جوانێن شۆرەشگەر» ڤە هاتنە رەڤاندن، ل پێش بارەگەها فەرماندارێ گشتی یێ هه‌سه‌دێ کەتنە گرەڤێ و داخوازا ڤەگەراندنا زارۆکێن خوە دکن.
هەژمارەک ژ دایکیێن کو زارۆکێن وان ژ ئالیێ «جوانێن شۆرەشگەر» ڤە هاتنە رەڤاندن، ل پێش بارگەها فەرماندارێ گشتی یێ هێزێن سووریەیا دەمۆکرات (هه‌سه‌دێ) مەزلووم عه‌بدی یا ل باژارێ حەسەکێ کەتن گرەڤێ.
دایکان داخوازا ناسکرنا چارەنڤیسا زارۆکێن خوە و ڤەگەراندنا وان بۆ مالێ ژ مەزلووم عه‌بدی کرن.
مانگرتنا دایکان ژ رۆژا سێشەمییا دەرباسبوویی ڤە دەست پێ کریە و هەتا نها فەرماندارێ گشتی یێ هه‌سه‌دێ مەزلووم عه‌بدی بەرسڤا وان نەدایە.
د دەما داوی دە، چەند زارۆک و جوانێن د بن 18 سالیێ ده ژ ئالیێ تەڤگەرا «جوانێن شۆرەشگەر» ڤە هاتبوون رەڤاندن، مالباتێن زارۆکان ژی داخوازا ڤەگەرا زارۆکێن خوە دکن.
تەڤی کو هه‌سه‌دێ د هەزیرانا 2019ان دە ب نەتەوێن یەکگرتی رە پلانەک ژ بۆ بداویکرن و قەدەغەکرنا تەڤلیکرنا زارۆکان د ناڤا چەکداران دە ئیمزە کربوو. لێ ژ دەما کو پەیمان هاتیە ئیمزەکرن ڤە، رەوشا رەڤاندنا زارۆکان بداوی نەبوویە.
مالباتێن زارۆکێن رەڤاندی ژی کریارێن تەڤگەرا «جوانێن شۆرەشگەر» شەرمەزار دکن و بانگ ل رێخستنێن کو گرینگیێ ددن مافێن زارۆکان، رێخستنێن ناڤدەولەتی و ئالیێن پێوەندیدار دکن کو فشارێ ل رێڤەبەریا خوەسەر و هه‌سه‌دێ بکن تا کو چارەنڤیسا زارۆکێن وان دیار بکن.
