به‌رخوه‌دانا ساخته یا په‌كه‌كێ رۆژ ب رۆژ زێده‌تر زرارێ دگهینه هه‌رێما كوردستانێ
شه‌رێ ساخته یێ كو په‌كه‌كه ئیدیعا دكه ل دژی تركیه‌یێ دكه، رۆژ ب رۆژ زێده‌تر زرارێ دگهینه هه‌رێما كوردستانێ و وه‌لاتیێن وێ، هه‌ری داوی دوهـ رۆژا ئینی دو وه‌لاتیێن سڤیل یێن شێلادزێ كه‌تن به‌ر ئێریشێن ده‌وله‌تا ترك و شه‌هید كه‌تن.
هه‌ر كو دچه رێخستنا په‌كه‌كێ پێتر لڤ و ته‌ڤگه‌رێن خوه نێزی گوندان و سینۆرێ باژارۆكێن هه‌رێما كوردستانێ دكه، ره‌وش ژ بۆی وه‌لاتیێن گوندان ئه‌وقاس خه‌ته‌ر بوویه كو ئێدی نكارن ل ئاقارێ گوندێن خوه ت كه‌سابه‌ته‌كێ ژ بۆی خوه بكن، هه‌ری داوی دو ولاتیێن گونده‌كی ناحیه‌یا شێلادزێ كه‌تن به‌ر ئێریشان و شه‌هید كه‌تن.
وه‌زاره‌تا به‌رگریێ یا تركیێ ئیرۆ راگهاند، د ئێریشێن 24 ساعه‌تێن رابووری ده 13 چه‌كدارێن په‌كه‌كێ هاتنه كوشتن، په‌كه‌كێ ت داخویانی ده‌ربارێ زرارێن خوه نه‌دانه، لێ یا راست هه‌ردو ئالی راست نابێژن، تركیه و په‌كه‌كه مژارا ئیلانكرنا هه‌ژمارا كوشتیان وه‌كه شه‌ره‌كی تایبه‌ت ل دژی هه‌ڤ دمه‌شینن، یێ كو زرارا راستین یا ڤی شه‌رێ ساخته ژی دده، ته‌نێ وه‌لاتیێن هه‌رێما كوردستانێ نه.
156 سڤیل ژ ته‌باخا 2015ێ ل هه‌رێما كوردستانێ ب سه‌ده‌ما شه‌رێ په‌كه‌كێ و تركیێ شه‌هید بوونه
بالافرێن شه‌ر یێن تركیێ دوهـ ته‌عقیبا لڤ و ته‌ڤگه‌رێ په‌كه‌كێ یێن ل سینۆرێ گوندێ دێوكێ گرێدای ناحیه‌یا شێلادزێ كر، پشتره گوندێ ناڤبووری بۆردۆمان كر و د ئەنجامێ دە دو وەلاتیێن ب ناڤێن سەعید موبارەک (1986) و ئاراس فەرەج (1995) كو ژ بۆی كۆمكرنا گیایێ بهارێ ده‌ركه‌تبوون، شەهید كه‌تن.
ل گۆری ئاگاهیێن ده‌ستێ مه، ژ تەباخا 2015ان ڤە 152 سڤیل د ئەنجاما ئێرشێن ترکیێ یێن ل هەرێما کوردستانێ دە جانێ خوە ژ دەست دایە و 228 سڤیل ژی بریندار بوونە.
ژ دەستپێکا ئیسال 2024ێ ژی هەتا نها 4 سڤیلان ل هەرێما کوردستانێ ژ بەر ئێرشێن ترکیێ جانێ خوە ژ دەست دایە.
شەرێ په‌كه‌كێ و ترکیێ ل دەڤەرێن سینۆری یێن هەرێما کوردستانێ رۆژ ب رۆژ زێدەتر زرارێ دگەهینە وەلاتیێن هەرێما کوردستانێ. ژ بەر وی شەری، نێزی 800 گوندان و هەژمارەکا دەڤەرێن گەشتیاری ل سینۆرێ هەرێما کوردستانێ هاتنە وێرانکرن و بەردان. پرانیا وان گوندان دکەڤن سینۆرێ پارێزگەها دهۆکێ. ڤێ یەکێ ژی زرارەکا زێدە گەهاندیە کەرتێن گەشتیاریێ و چاندنێ یێن هەرێما کوردستانێ.
په‌كه‌كه ب ره‌نگه‌كی سیتستماتیك هه‌ولا وێرانكرنا گوندان دكه
رێخستنا په‌كه‌كێ ژ بۆی كو گوندێن باشوور ببن مه‌یدانا شه‌ر و وه‌رن ڤالا كرن، رۆژ ب رۆژ شه‌رێ خوه یێن ساخته نێزی گوندان دكه، ره‌وش گهاندیه ئاسته‌كی ووسا كو هنه‌كی مایه ژیان ب ته‌مامه‌تی ل گوندێن سینۆری نه‌مینه.
ل گۆر داوی ئاماژەیێن ناڤەراستا مەها تەباخا سالا رابووری، 274 گوند ل سینۆرێ پارێزگەها دهۆکێ ژ بەر وی شەری هاتنە بەردان کو 250 ژ وان دکەڤن سنۆرێ قەزایا ئامێدیێ و 24 ژی دکەڤن سنۆرێ قەزایا ئاکرێ. هەروەسا 47 گوند ل سنۆرێ ئیدارەیا سەربخوە یا زاخۆیێ ژی ژ بەر وی شەری هاتنە بەردان.
