خەلکێ عەفرینا رۆژئاڤایێ کوردستانێ ب دلەکی شکەستی پێشوازی ل ھاتنا مەھا رەمەزانێ دکە. ل گۆری وەلاتی و فرۆشکاران، بازارا عەفرینێ ل گۆری سالێن بۆری پر لاوازە، لڤ و تەڤگەرا خەلکێ ژی کێمە و ژ بەر رەوشا ئابۆری، ئەو نکارن پێویستیێن خوە بکرن.
زێدەبوونا نرخێ مادەیێن خوارنێ ل ھەرێما عەفرینێ یا رۆژئاڤایێ کوردستانێ، ژیانا خەلکێ باژێر زەحمەت کریە و ئامادەکاریێن وان ژ بۆ جەژنا رەمەزانێ سینۆردار کریە.
نشتەجھێن باژێری گازندان دکن کو پار نرخێ کەلووپەلان پیچەکێ ئەرزان بوو، لێ ئیسال دو سێ قات زێدە بوویە و خەلک نکارن پێدڤیێن مەھا رەمەزانێ بکرن.
لاوازبوونا دراڤێ ناڤخوە، بلندبوونا نرخێ شەکر، برنج، روون و کرێیا ڤەگوھەستنێ، بوویە سەدەما نیگەرانی و نەرازیبوونێ، وەلاتی داخواز ژ رایەداران دکن کو چارەیەکێ ژ ڤێ رەوشێ رە ببینن.
ژ دەما داگیرکرنا باژێر ڤە، ژ بلی تێکچوونا رەوشا ئەولەھی، رەوشا دارایی یا خەلکێ رۆژ ب رۆژ خرابتر دبە، وەلاتی ژی بانگ دکن کو دڤێت دەستھلاتداریا خوەجھی زێدەتر ھەڤکاری و ھەڤاھەنگیێ ب رێخستنێن مرۆڤی و ناڤدەولەتی رە بکە، تا کو ئالیکاریێن مرۆڤی و ژیانێ بگھە ھەرێمێ.
