چه‌كدارێن په‌یه‌دێ نڤیسینگەها PDK-S ل دێرکێ شەوتاندن

پشتی کۆبانێ، دربێسیێ و عاموودێ، نڤیسینگەها پارتیا دەمۆکراتا کوردستانێ – سووریە (PDK-S) ل دێرکێ هاتە شەوتاندن.

مالپەرا PDK-S بەلاڤ کر، «نڤیسینگەها PDK-S یا ل دێرکێ شەڤا بۆری ژ ئالیێ چەکدارێن سەر ب په‌یه‌دێ ڤە هاتە شەوتاندن».

ئەڤ یەک پشتی وێ تێ، د چەند رۆژێن بۆری دە، ئۆفیس و نڤیسینگەهێن په‌ده‌كه‌سێ و ئه‌نه‌كه‌سێ ل کۆبانێ، دربێسیێ و عاموودێ ژی راستی ئێریشان هاتبوون.

دەربارێ ئێریشێن ل سەر نڤیسینگەهێن ئه‌نه‌كه‌سێ ل رۆژئاڤایێ کوردستانێ دە، بالیۆزخانەیا ئامەریکایێ ل شامێ رۆژا 8ێ ئادارێ پەیامەک ل سەر تۆرا جڤاکی یا «X» بەلاڤ کر و تێ دە گۆت، «ئەم ل هەمبەر ئێریشێن ل سەر نڤیسینگەهێن ئه‌نه‌كه‌سێ ل باکور و رۆژهلاتێ سووریەیێ دلگرانن».

هەروه‌سا بالیۆزخانەیا ئامەریکایێ ل شامێ بانگ ل تەڤ ئالیان کر ژی کو تەڤلی دانوستاندنێن ئاشتیانە ببن ژ بۆ پێکانینا داخواز و ئارمانجێن گەلێ سووریەیێ بێ توندوتووژی.