ئیرۆ 54 سالیا رێکەفتنا 11 ئادارا 1970 کو د ناڤبەرا سەرکردەیێ تەڤگەرا رزگاریخوازا گەلێ کوردستانێ مەلا مستەفا بارزانی و رەژیما بەرێ یا ئیراقێ دە ھاتبوو ئیمزەکرن.
رێکەفتن ژ پێشگۆتنەکێ و 22 خالان پێک دھات کو 15 ژ وان ئەشکەرە و 7 ژی نھێنی بوون، خالێن نھێنی ژی گرێدایی دیارکرنا ھەرێما ئۆتۆنۆمی یا کوردستانێ، سەرەراستکرنا دەستوورا ئیراقێ و چارەسەرکرنا ناڤچەیێن کوردستانی کەرکووک، خانەقین و شنگالێ بوون.
دەقا داخویانیا ھەڤپارا رێکەفتنێ:
یەکەم: ناسکرنا زمانێ کوردی ل کێلەک زمانێ عەرەبی ل ھەرێمێن کو پرانیا وان کوردن.
دویەم: کورد دێ ب تەڤاھی بەشداری رێڤەبەریێ ببن، د ناڤ ئارتێشێ دە ژی.
سێیەم: پەروەردە و چاندا کوردی بێ پێشخستن.
چارەم: ل ھەرێمێن کو پرانیا وان کوردن، ھەموو کارمەند دێ کورد بن.
پێنجەم: کورد ئازادن کو رێخستنێن خوەندەکار، جوان، ژن و مامۆستەیان ئاڤا بکن.
شەشەم: بودجەیەکا پێویست ژ بۆ ئاڤاکرنا کوردستانێ بێ تەرخانکرن.
ھەفتەم: مووچەیەک ژ بۆ مالباتێن شەھیدان، ھەژار و پەنابەران تێ دیارکرن.
ھەشتەم: کورد و عەرەب دێ ڤەگەرن جھێن خوەیێن بەرێ.
نەھەم: چاکسازیا چاندنیێ دێ بێ کرن.
دەھەم: گەلێ ئیراقێ ژ دو نەتەوەیێن کورد و عەرەب پێک تێ.
یازدەھەم: رادیۆ و چەکێن گران دێ رادەستی دەولەتێ هێن کرن.
دووازدەم: یەک ژ جیگرێن سەرۆککۆمارێ ئیراقێ کورد بە.
سێزدەھەم: ئیدارەیا وەلات ل گۆر ڤێ رێکەفتنێ تێ برێکخستن.
چاردەھەم: بودجەیا ھەرێمێن کو پرانیا وان کورد لێ دژین، دێ د یەکینەیەکا ئۆتۆنۆمی دە بێ برێکخستن.
پازدەھەم: گەلێ کورد ل گۆری نفووسا خوە بەشداری دەستھلاتا یاسادانانێ دبە.
لێ د دەمەکا کورت دە پشتی ژ نوو ڤە برێخستنکرنێ، رەژیما بەعس رێکەفتن بنپێ کر، ناڤێ کورد وەک نەتەوە د دەستوورا دەمکی یا سالا 1970 دە بجھ نەکر و پەروەردەیا کوردی ھەلوەشاند. ھەروھا جیبجیکرنا ھەشت خالێن رێکەفتنێ ژی پاشگوھ کر. ل کەرکووک، خانەقین و شنگالێ پێڤاژۆیا عەرەبکرنێ بەردەوام کر. فایل ژ بەغدایێ دەرخستن، ناسنامەیا وان ژ وان ستاند و بێیی کەرکووک، خانەقین و شنگالێ ھەرێمەکا ئۆتۆنۆمیا کوردستانێ ب یەکالی دیار کر. د 6 ئادارا 1975 دە ژ بۆ تێکبرنا شۆرەشا کوردستانێ لگەل دەولەتا ئیرانێ پەیمانەک ئیمزە کر.
گەلەک ژ سییاسەتمەدار و چاڤدێرێن سیاسی ڤێ رێکەفتنێ، وەک دەستکەفتا دویەما پشتی پەیمانا سیڤەرێ دبینن کو تێ دە حکوومەتا ئیراقێ مافێن نەتەوی یێن گەلێ کورد ناس کر و ڤێ رێکەفتنێ ھێڤی دا جڤاکا کوردستانێ.
