پشتی کۆبانێ، دربێسیێ، عاموودێ و دێرکێ، ئۆفیسا پارتیا دەمۆکراتا کوردستانێ – سووریا (پەدەکە-سە) ل گرگێ لەگێ ژی ھاتە شەوتاندن.
پارتیا دەمۆکراتا کوردستانێ – سووریا (پەدەکە-سێ) راگھاند، دەرەنگیا شەڤا بۆری ئۆفیسا وێ ل باژارۆکێ گەرکی لەگێ یێ سەر ب دێرکێ ڤە، ژ ئالیێ چەکدارێن پەیەدێ ڤە ھات شەوتاندن و زیانێن مادی گھیشتیێ.
ئەڤ یەک پشتی وێ تێ، د چەند رۆژێن بۆری دە، ئۆفیسێن پەدەکە-سێ و ئەنەکەسێ ل کۆبانێ، دربێسیێ و عاموودێ و دێرکێ ژی راستی ئێریشان ھاتبوون و ھاتبوون شەوتاندن.
سەرۆکێ ئۆفیسا کارووبارێن خوەجھی یێن ئەنەکەسێ نەشەت زازا دوھ دەربارێ شەوتاندنا ئۆفیسێن پەدەکە-سێ دە راگەھاندبوو: “ئەڤ کریارە ناکەڤنە د خزمەتا چ کەسەکی، ژ بلی خزمەتا دژمنێن ملەتێ کورد. جوانێن شۆرەشگەر ب دەھان جاران کریارێن وھا ل بەر چاڤێن ئاساییشێ کرنە، لێ ئاساییشێ چ تشتەک نەکریە و ل پێشیا ڤان کریاران نەبوویە رێگر”.
ھەر د ڤێ دەربارێ دە ژی بالیۆزخانەیا ئامەریکایێ ل شامێ رۆژا 8 ئادارێ پەیامەک ل سەر تۆرا جڤاکی یا “X” بەلاڤ کر و تێ دە گۆت، “ئەم ل ھەمبەر ئێریشێن ل سەر ئۆفیسێن ئەنەکەسێ ل باکور و رۆژھلاتێ سووریێ دلگرانین”.
