سەرۆکێ گشتییێ پارتییا وەلاتپارێزێن کوردستانێ (PWK) موستافا ئۆزچەلیک:
پەیمانا ئۆتۆنۆمییێ یا 11 ئادارا 1970 دەستکەفتنەکا دیرۆکی یا ملەتێ کوردە
ل سەر پەیمانا ئۆتۆنۆمییێ یا 11 ئادارا 1970 دە 54 سال دەرباس بوو.
ل باشوورێ کوردستانێ پشتی دەستپێکرنا شۆرەشا ئیلۆنێ، ب بەدەلێن مەزن، دەولەتا ئیراقێ یا د دەستھلاتدارییا بەعسیا دە، مەجبوور ما کو ل گەل پەدەکەیێ (پارتییا دەمۆکراتا کوردستانێ) و سەرۆکێ شۆرەشا کوردستانێ مەلا مستەفا بارزانی یێ نەمر پەیمانەکێ ئیمزە بکە. ب پەیمانا ئۆتۆنۆمییێ یا 11 ئادارا 1970، ملەتێ کورد، گەلێ کوردستانێ ل باشوورێ کوردستانێ مافێ ئۆتۆنۆمییێ بدەست خست.
ھەتا کو د سالا 2005 دە دەستکەفتنا فەدەرالییێ یا ھەرێما کوردستانێ د قانوونا بنگەھینا ئیراقێ دا جیھ گرت، د تێکۆشینا 200 سالی یا ژبۆ ئازادییا کوردستانێ دا، جارا یەکەم، ب پەیمانا ئۆتۆنۆمییێ یا 11 ئادارا 1970، ب ئاوایەکی یاسایی د قانوونا بنگەھینا دەولەتەکا کو پەرچەیەکا کوردستانێ داگیر کرییە دە، مافێن نەتەوی و دەمۆکراتیک یێن ملەتێ کورد و ستاتویەکا سییاسی ژ بۆ گەلێ کوردستانێ ھاتە قەبوول کرن.
پەیمانا ئۆتۆنۆمییێ یا 11 ئادارا 1970، دەستکەفتنەکێ دیرۆکی و بەرھەم و نیشانا بریارداری، سەبر، کەد، خەبات ، بەدەل، تەجرووبە و دلسۆزییا 200 سالییا تێکۆشینا ئازادییا کوردستانێ بوو.
پەیمانا ئۆتۆنۆمییێ یا 11 ئادارا 1970، د رێیا مافێ چارەنووسییێ دە بنگەھ و دەستپێکەک بوو کو ژ ئالییێ داگیرکەرەکی کوردستانێ ڤە وەکە فەرمی ھاتبوو قەبوول کرن. ب ڤێ پەیمانێ، پارلامەنتۆیا ئۆتۆنۆمییێ دھاتە دامەزراندن. ل گۆری پەیمانا ئۆتۆنۆمیێ دێ ل سێ باژارێن باشوورێ کوردستان (ھەولێر، سلێمانییە، دھۆک) کو ئەو ژی بەس نێڤییا ئاخا باشوورێ کوردستانێ بوون، ب سازکرنا پارلامەنتۆیا ئۆتۆنۆمییێ ل ھەولێرێ دێ ئۆتۆنۆمی بھاتا برێڤەبرن. لێ ستاتویا نێڤییا دن یا ئاخا باشوورێ کوردستانێ، ئانگۆ ستاتویا کەرکووکێ، دۆر و بەرا مووسلێ و ناڤچەیێن دنێن باشوورێ کوردستانێ دێ پاشێ بھاتا زەلال کرن. ب پەیمانا ئۆتۆنۆمییێ زمانێ کوردی ل گەل زمانێ عەرەبی وەک زمانێ فەرمی ھاتە قەبوول کرن. ھەروەھا ب ڤێ پەیمانا ئۆتۆنۆمییێ، ملەتێ کورد، ب ئاوایەکی فەرمی، وەک شریکەکی دەستھلاتدارییا دەولەتا ئیراقێ ھاتییە قەبوول کرن. 5 وەزیرێن کوردان د جڤاتا وەزیران دا جیھ گرتن.
رەژیما بەعس نەخوەست خالێن ڤێ پەیمانێ بجیھ بینە؛ ھەر ب رێ و ئاموورەن جودا جودا ئەڤ پەیمانە بنپێ کر.
ئەڤ ھەول و نیەت و سییاسەتا رەژیما بەعس د ئەنجامێ دا ھاتە وێ ئاستێ کو، د سالا 1974 دا، سەددام حوسێن پەیمان تونە حەسباند و وەزیرێن کوردان ژ جڤاتا وەزیران دەرخست. ژ بەر ڤان گاڤ و سییاسەتێن بەعسیان، سەرکردایەتییا شۆرەشێ، مەجبوور ما کو جارەکا دن دەست باڤێژە چەکی و سەریھلدە.
پەیمانا ئۆتۆنۆمییێ یا 11 ئادارا 1970 و رێڤەبرییا شۆرەشا کوردستانێ یا د بن سەرۆکاتییا مەلا مستەفا بارزانی یێ نەمر دە، د تێکۆشینا خوە بخوە ئیدارە کرنا گەلێ کوردستانێ دە تەجرووبەیەکا مەزن بوو و گەلەک دەستکەفتین نەتەوی و دیرۆکی ب خوە رە ئانی.
پشتی کۆمارا کوردستانێ (کۆمارا مەھابادێ) ، تەجرووبەیا ئۆتۆنۆمی یا باشوورێ کوردستانێ ژی، د ھووناندنا دیوارێ ئازادییا کوردستانێ دا بناغەیەک گرینگ و ئەساسی بوو.
ب پەیمانا ئۆتۆنۆمییێ، ل ئیراقێ جارا یەکەم بوو کو وەکە فەرمی، د قانوونا بنگەھینا دەولەتا ئیراقێ دا، ھەبوونا ملەتێ کورد و مافێ وی یێ نەتەوی، دەمۆکراتیک دھاتە قەبوول کرن.
پەیمانا ئۆتۆنۆمییێ ژ ئالییێ سییاسی، چاندی، مۆرال، ھەست و بیر و باوەری و ھشمەندییا نەتەوی دا ل ھەموو پەرچەیێن کوردستانێ و ل جیھانێ بایێ ل خوە ڤەگەر و ڤەژینەکا نەتەوی، نشتمانی یا نوو بەلاڤ کر.
ل گەل ھەموو ئاستەنگییان ژی، پەیمانا ئۆتۆنۆمییێ یا 11 ئادارا 1970 تەجروبەیەکا گرینگ و روومەت، دەستکەفتن و سەربلندییا ھەموو کورد و کوردستانی یێن جیھانێ یە.
د 54 سالییا پەیمانا ئۆتۆنۆمییێ یا 11 ئادارا 1970 دا، ئەم سەرۆک و ئەندازیارێ پەیمانا ئۆتۆنۆمییێ مەلا مستەفا بارزانی یێ نەمر و ھەموو پێشمەرگە، تێکۆشەر، خەباتکار و شەھیدێن کو د ئیمزەکرنا پەیمانا ئۆتۆنۆمییێ دا کەدا وان ھەیە ب گرامی ببیرتینن.
11/3/2024
مستەفا ئۆزچەلیک
سەرۆکێ گشتی یێ پارتییا وەلاتپارێزێن کوردستانێ (PWK)
