پێنج کۆلبەرێن ب ناڤێن ھیوا رەحیم پەنایێ خەلکێ سەقزێ، کەمال حەبیبی یێ خەلکێ سنە، ئومێد مورادی یێ خەلکێ مەریوانێ، ھادی و محەمەد یێن خەلکێ سینۆرێ نەوسوودێ ب گولـلەیێن راستەراست یێن ھێزێن ئەولەھیا ئیرانێ ھاتن بریندارکرن.
ل گۆر زانیاریێن بەردەست دوھ ئێڤاری 10/3/2024، کەمال حەبیبی یێ کۆلبەرێ روونشتڤانێ گوندێ ھەشەمێزا سەر ب باژارێ سنە، ب گولـلەیێن راستەراستێن ھێزێن ئەولەھیا ئیرانێ ل نەوارا سینۆرێ نەوسوودێ ژ دەستێ خوەیێ چەپێ ڤە ھات بریندارکرن و ژ بۆ چارەسەریا پزیشکی ژ بۆ نەخوەشخانەیا نەوسوودێ ھاتە ڤەگوھەستن.
ھەروھا کۆلبەرێ خەلکێ مەریوانێ یێ ب ناڤێ ئومێد مورادی ب کەڤر لێدانێ ڤە ژ ئالیێ ھێزێن ئەولەھیا ئیرانێ ڤە ب گرانی ھات بریندارکرن و ژ بۆ چارەسەریا پزیشکی ژ بۆی نەخواشخانەیا نەوسوودێ ھاتە ڤەگوھەستن.
ئیرۆ 11/3/2024 ژی دو کۆلبەرێن ب ناڤێن ھادی یێ تەمەن 31 سالی و محەمەد ل سینۆرێ نەوسوود، ب گولـلەیێن راستەراستێن ھێزێن ئەولەھیا ئیرانێ ھاتن بریندارکرن.
ھەروھا رۆژا ئینێ ژی ھیوا رەحیم پەنایێ خەلکێ سەقزێ ب گولـلەیێن راستەراستێن ھێزێن چەکدارێن ئیرانێ ڤە ل سینۆرێ ھەنگەژالی یا بانە ھاتە بریندارکرن.
ل گۆر چاڤکانیێن ئاگاھدار، ئەو کۆلبەرە پشتی ھاتیە گرتن و لێدان و ژ مەسافەیەکی نێزیک دە دابوون بەر گولـلەیان و ژ لنگێ وی دە بریندارکرن.
