ئیدارەیا بایدن پێشنیار کریە کو کۆنگرێس ژ بۆ سالا 2025 زێدەتری 849 ملیار دۆلاران ژ بۆ بودجەیا بەرەڤانیێ یا ئامەریکایێ جێبجێ بکە. ھەر د وێ چارچۆڤەیێ دە ژی، زێدەتری 528 ملیۆن دۆلاران ژ بۆ راھێنان و پرچەک کرنا پێشمەرگەیان، ھێزێن ئیراقێ و ھێزێن سووریەیا دەمۆکراتیک ھەسەدێ ھاتنە تەرخانکرن.
ئامەریکا بەردەوام ھەرێما کوردستانێ وەکی ھەڤپەیمانەکا خوەیا باوەرپێکری دبینە، بەردەوام پشتەڤانیا خوە ژی ژ بۆ ھێزێن پێشمەرگەیان تەکەز دکە و رۆلێ وان ژی د رووبرووبوونا تەرۆرێ دە بلند دنرخینە.
ئیدارەیا بایدن دوھ 11/3/2024 پێشنیارا بودجەیا بەرەڤانیێ یا ئامەریکایێ ژ بۆ سالا 2025 ژ کۆنگرێسێ رە شاند، د وێ پێشنیارێ دە ژی پشکەکا بودجەیێ ژ بۆ راھێنان و پرچەککرنا ھێزێن پێشمەرگەیان ھاتیە تەرخانکرن.
سەرۆکێ ئامەریکایێ جۆ بایدن پێشنیار کریە، ژ بۆ سالا 2025ێ 849 ملیار و 800 ملیۆن دۆلار ژ بۆ بودجەیا بەرەڤانیێ یا وەلاتێ وی بێن تەرخانکرن.
ژ وی پەرەیی ژی داخواز ھاتیە کرن، 528 ملیۆن و 966 ھەزار دۆلار ژ بۆ راھێنان و پرچەککرنا پێشمەرگەیان، ھێزێن ئیراقێ و ھێزێن سووریەیا دەمۆکراتیک بێن پەژراندن. ژ وێ ھەژمارا ژی 380 ملیۆن و 758 ھەزار دۆلار ژ بۆ پێشمەرگەیان و ھێزێن ئیراقێ و 147 ملیۆن و 941 ھەزار دۆلار ژی ژ بۆ ئالیکاریکرنا ھێزێن سووریەیا دەمۆکراتیک بێن تەرخانکرن.
ئەو 380 ملیۆن دۆلارێن ژ بۆ پێشمەرگە و ھێزێن ئیراقێ ھاتنە پێشنیارکرن ژی د چارچۆڤەیا یەک پاکێجێ دە نە و ب ڤی رەنگی ھاتنە لێکڤەکرن، 257 ملیۆن و 58 ھەزار دۆلار ژ بۆ راھێنان و پرچەککرنێ، 9 ملیۆن و 700 ھەزار دۆلار ژ بۆ ئالیکاریێن لۆجیستی، 60 ملیۆن دۆلار ژ بۆ مووچەیان، 4 ملیۆن و 795 ھەزار دۆلار ژ بۆ نووکرن و چاککرنا ژێرخانەیێ و 49 ملیۆن و 205 ھەزار دۆلار ژی ژ بۆ وەرشەیێ، یانی چاککرنا چەک، ترومبێل و کەرستەیێن دن.
ئالیکاریێن ئامەریکایێ ژ بۆ پێشمەرگەیان، ھێزێن ئیراقێ و ھێزێن سووریەیا دەمۆکراتیک د دەمەکێ دە نە کو ھێشتا داعش ل سەر دەڤەرێ مەترسییە. وەزارەتا بەرەڤانیێ یا ئامەریکایێ تەکەز ژی کریە، “ئامەریکا پابەندی ئالیکاریکرنا پێشمەرگەیان، ھێزێن ئیراقێ و ھێزێن سووریەیا دەمۆکراتیکە، ژ بۆ نەھێلانا داعشێ”. ئەشکەرە ژی کریە، “مەترسیا داعشێ ھێشتا مایە و بزاڤێ دکە دیسا خوە رێک بخە.”
بریارە پێشنیارا بایدن د چەند مەھێن بێ دە ل جڤاتا پیران و نوونەرێن ئامەریکایێ بێ پەژراندن. پشتی پەژراندنێ ژی، بایدن دێ ئیمزا بکە و سالا بێ دێ بێ بجھانین. ئەڤ ژی د دەمەکێ دەیە کو، دانا سیستەما بەرگریا ئاسمانی ب ھێزا پێشمەرگەیان د بودجەیا بەرەڤانیێ یا ئامەریکایێ دە یا سالا 2024 ھاتیە پەژراندن.
